टीआरसी विधेयक फास्ट ट्रायकबाट पारित गर्न प्रधानमन्त्रीले मागे ओलीको सहयोग
साझा परिवेश
शुक्रबार, बैशाख ८, २०८० १४:४४
काठमाडौं । प्रधानमन्त्री पुष्पकमल दाहाल ‘प्रचण्ड’ले संक्रमणकालीन न्यायसम्बन्धी विधेयक फास्ट ट्रयाकबाट पारित गर्नका लागि प्रतिपक्षी दल नेकपा (एमाले) का अध्यक्ष केपीशर्मा ओलीसँग सहयोग मागेका छन् ।
शुक्रबार सिंहदरबारमा भएको छलफलमा प्रधानमन्त्रीले संक्रमणकालीन न्याय निरुपणका लागि ढिलाइ भएको भन्दै विधेयक पारितका लागि सहयोग गर्न आग्रह गरेको उनको सचिवालयले जनाएको छ ।
टीआरसी विधेयक संसद्मा पेस भएर सैद्धान्तिक छलफल भइसकेको छ । तर, एमालेले बृहत छलफल नगरी विधेयक पारित गर्ननहुने अडान राख्दै आएको छ ।
त्यस्तै, छलफलमा प्रधानन्यायाधीश नियुक्तिका विषयमा पनि छलफल भएको सचिवालयले जनाएको छ । प्रधानन्यायाधीश नियुक्तिका विषयमा छलफल गर्न केही दिनअघि बसेको संवैधानिक परिषद्को बैठक निष्कर्षविहीन टुंगिएको थियो ।
