सिमकोट । खेतमा लगाइएको बालीनाली राम्रो होस् र पछिल्लो समय फैलिएको रोगब्याधी हटाउन अदानचुलीको श्रीनगरमा राँगाको बलि दिइएको छ। वर्षभरि फैलिएको रोगब्याधी हटाउन र अन्न उत्पादन होस भन्ने हेतुुले पौराणिक मान्यतासाथ राँगोलाई श्रीनगरका गाउँ घुमाउँदै बलि दिइएको हो।
परम्पराअनुसार माझखाडाबाट सुरु गरी भण्डारी गाउँ, फडेरागाउँ हुँदै रोकाया गाउँ घुमाउदै राँगाको ढाडमा रातोमाटो ढटेलोको झुप्रा हान्दै खेदेर बलि चढाउने स्थानमा बलि दिएको हो।
उक्त बलि दिने ठाउँमा पुर् याउनुअघि भण्डारी गाउँमा रहेको कालेको देवालयमा नाक, कान काटी श्रीनगरका भण्डारी गाउँ, बुढागाउँ, साउबाडा, फडेरा गाउँ, रोकायागाउँ घुमाउँदै बलि दिइन्छ।
बलि दिनुअघि राँगोको ढाडमा हान्ने काँडाको झुप्रा सिङमा बाँध्ने विभिन्न अन्न राखिएको कपाडामा आफ्नो घरमा घुमाई रागोसँगै चौबाटोमा फाल्ने प्रचलन छ। यसले गर्दा गाउँमा फैलिएको रोग भोक तथा अनिष्ट अन्त्य हुने मान्यता रहेको छ।
सबै गाउँबाट जम्मा भएका स्थानीय युवाले हातमा तरवार खुँडाजस्ता हतियार लिएर लाइनमा उक्त राँगाको बलि दिएका हुन्। राँगो हान्ने र काले देवताको पूजाको रुप लिई बलि दिएमा समाजमा रोगदेखि भोकसम्मको कष्ट हरण हुने मष्टो देवताका पुजारीसमेत रहेका अदानचसली २ का सौर्य बुढाले जानकारी दिए।
परापूर्व कालदेखि नै डाँडाको मदानले वर्षा पार्ने र थाम्ने काम खोलाको कालेले सबै कष्ट हट्ने विश्वासका आधारमा राँगाको बलि दिने गरिएको उनले बताए। स्थानीय नागरिकले राँगो खरिदका लागि सबै घरधुरीबाट रकम उठाउने गरिन्छ।
