काठमाडौं । त्रिभुवन विश्वविद्यालयमा आंशिक शिक्षकका रूपमा कार्यरत ललित विष्ट केन्द्रीय समाजशास्त्र विभागका प्रमुख डा. युवराज लुईंटेलमाथि टोलेगुण्डाको शैलीमा प्रस्तुत भएका छन् । शान्त र शालिन छविका डा. लुईंटेललाई उनले कार्यकक्षमै पटक-पटक हेल्मेट उज्याएका थिए ।
यो घटना गत १३ वैशाखको हो, जुन दृष्य सीसीटीभी फुटेजमा पनि कैद भएको छ । भिडिओमा विष्टले अपशब्दसहित निरन्तर गालीगलौज गरेको तथा तोडफोडसमेत गरेको दखिन्छ । डा. लुईंटेलले संयमित भएर जवाफ दिइरहँदा पनि उनले तुच्छ र उद्दण्ड व्यवहार देखाएका थिए । विष्टलाई रोक्नका लागि प्रहरी नै बोलाउनु परेको थियो ।
गत १७ गते पनि उनले यस्तै व्यवहार दोहोर्याएपछि घटनाको भिडिओ फुटेजसहित हिजो लुईंटेलले जिल्ला प्रहरी परिसर काठमाडौंमा किटानी जाहेरी दिएका छन् । प्रहरीले यसमा अनुसन्धान सुरू गरेको छ ।
विष्ट चार वर्षदेखि त्रिविमा आंशिक शिक्षकका रूपमा कार्यरत छन् । उनी राजनीतिक पहुँच प्रयोग गरी जागीर खान आएका थिए । अहिले त्रिविको समाजशास्त्र विभागमा उनीसहित पाँचजना आंशिक शिक्षक छन् । आंशिक शिक्षकहरूले पिरियडका आधारमा पारिश्रमिक पाउने गर्छन् । करार शिक्षकले भने मासिक तलब-सुविधा पाउँछन् ।
विभागले आंशिक शिक्षकहरूमध्येबाट ३ जनालाई करारमा नियुक्ति गर्ने प्रयास गरिरहेको छ । उनीहरूलाई करारमा लैजान मिल्ने गरी आंशिक शिक्षक व्यवस्थापन कार्यविधि बनाइएको थियो । त्यसकै आधारमा तीनजनालाई करारमा नियुक्त गर्नका लागि विभागीय प्रमुख डा. लुईंटेलले त्रिवि उपकुलपतिको कार्यालयमा पत्राचार गरेका छन् । तर, कार्यालयले त्यसको जवाफ दिएको छैन । कार्यालयको स्वीकृतिविना करारमा नियुक्त गर्न मिल्दैन ।
पाँच करार शिक्षकमध्ये योग्यताका आधारमा विष्ट सबैभन्दा पछाडि छन् । एकजनासँग फ्रान्सको र अर्कासँग जर्मनीको पीएचडी छ । थप दुईजना एमफिल डिग्री प्राप्त हुन् । विष्टले भने स्नातकोत्तरमात्रै गरेका छन् । योग्यताका आधारमा नियुक्त गर्दा आफू नपर्ने निश्चित ठानेर नै विष्टले गुण्डागर्दी गरेका हुन् ।
पार्टीगत आधारमा कोटा छुट्याएर करार शिक्षक नियुक्त गर्नुपर्ने उनको अव्यक्त माग छ । उनी एमालेको कोटाबाट त्रिविमा जागीर खान आएका हुन् । उनी पार्टटाइम शिक्षकहरूको तर्फबाट नेतागिरीसमेत गर्दै आएका छन् । त्रिविमा १ हजारभन्दा बढी पार्टटाइम शिक्षक छन् । उनीहरूको एउटा समूहले केही समयअघि शिक्षा सेवा आयोगको कार्यालयमा धेरै दिनसम्म तालाबन्दी गरेको थिए । सेवा आयोगले स्थायी शिक्षक नियुक्त गर्नुअघि नै आफूहरुलाई करारमा नियुक्त गर्नुपर्ने उनीहरुको माग थियो । यसरी तालाबन्दी गर्नेमा विष्ट पनि एक थिए ।
भिडिओ फुटेजमा विष्टले विभागीय प्रमुखको टेबलमा रहेका केही कागजहरू पनि फालेको देखिन्छ । ती कागजहरू पीएचडीका प्रपोजल हुन् । एमएको थेसीस प्रपोजल आफूलाई नदिइएको भनेर उनले आक्रोश व्यक्त गरेका थिए । स्रोतका अनुसार अहिलेसम्म एकजना पनि विद्यार्थीले विष्टको अन्डरमा थेसीस लेखेका छैनन् । कुनै पनि विद्यार्थीले थेसीस लेख्नका लागि उनलाई नरोजेको स्रोतको भनाइ छ । विद्यार्थीले नरोजिकन विभागीय प्रमुखले दिन मिल्दैन ।
स्रोतका अनुसार विभागले करार शिक्षक थपेर आफ्नै स्रोतबाट तलब खुवाउन सक्ने अवस्था छैन । स्वीकृति दिइएका करार शिक्षकको पारिश्रमिक पनि केन्द्रबाटै उपलब्ध गराउनुपर्ने विभागले निर्णय गरेर उपकुलपति कार्यालयलाई आग्रह गरेको छ । यसमा उपकुलपति कार्यालयले कुनै निर्णय लिएको छैन । विभागीय प्रमुख लुईंटेलले निरन्तर पहल भने गरिरहेका छन् ।
टीयू केन्द्रीय समाजशास्त्र विभाग प्रमुख डा. युवराज लुईंटेल
केन्द्रबाट स्वीकृति नआइकन आफूहरूले करारमा नियुक्त गर्न नसक्ने डा. लुईंटेल बताउँछन् । स्वीकृति आउनासाथ प्रक्रिया सुरु हुने उनको भनाइ छ ।
‘हामीले आफ्नो तर्फबाट पत्राचार गरिसकेका छौं । जवाफको प्रतीक्षामा छौं । तर, आजै गर, अहिल्यै गर भन्ने ढंगले धाकधम्की दिने काम भयो,’ उनले भने ।
यस विषयमा विष्टसँग बुझ्न खोज्दा उनको मोबाइल स्वीच्ड अफ थियो ।
