काठमाडौं । ‘सीमान्त गुरु’ भनिने भरत भट्टराईको यो कस्तो धन्दा हो । आँखामा हेरेर जस्तोसुकै रोग निको पार्ने भन्दै उपचारको नाममा ठगी धन्दा चलाउँदै आएका ‘सीमान्त गुरु’ काठमाडौं फर्किएका छन् । तारकेश्वर नगरपालिका वडा नम्बर ७ स्थित सूर्यकिरण टोलमा रहेको अलौकिक सीमान्त गुरु मनोवैज्ञानिक शास्त्री ज्योतिष प्रालिमार्फत् ठगी धन्दालाई निरन्तरता दिने योजनामा उनी काठमाडौं भित्रिएको स्रोतले बताएको छ ।
उक्त केन्द्रमा बसेर भट्टराईले टिकटक लाइभ र भिडियो कलमार्फत् सर्वसाधारणलाई रोग निको हुने भन्दै भ्रम फैलाउने कामलाई निरन्तरता दिइरहेका छन् । “गुरु अहिले टिकटक लाइभ र भिडियोबाट मात्रै परामर्श दिइरहनुभएको छ, व्यवस्थित गरेर केही दिनपछि बिरामीलाई बोलाउँछौँ” उनका सहयोगीले भने ।
यता, तारकेश्वर नगरपालिका वडा नम्बर ७ ले भट्टराईको गलत कामबारे गुनासो आएपछि ज्योतिष केन्द्र बन्द गराउन पहल थालेको छ । “यही वडामा उनीजस्तै माता गुरुजस्ता नाममा अरु ठगी कार्य पनि भइरहेको बुझेका छौँ । हामीले प्रहरी र स्थानीयको सहयोगमा उनको व्यवसाय बन्द गर्न पहल गरिरहेका छौँ,” वडा सचिव हरिकृष्ण अर्यालले भने ।
यसअघि स्थानीयसँग पैसा लिएर उपचार गर्ने भन्दै तुलसीपुर उपमहानगर वडा नम्बर ६ स्थित त्रिशिद्धेश्वरी मन्दिर पुगेका भट्टराईलाई जिल्ला प्रशासनले कार्यक्रम गर्न रोक लगाएको थियो । भट्टराईलाई तुलसीपुरकै उद्योगीको टिमले त्यहाँ पुर्याएको थियो । जेठ ७ गते आइतबार उक्त मन्दिरमा दाङबासीलाई भेट्ने कार्यक्रम राखेकोमा उनलाई भेट्न हजारौँ स्थानीयको भीड लागे पनि केही स्थानीयले भने उनको विरोध गरेपछि कार्यक्रम नगरी उनलाई भगाइएको थियो ।
१२ गते काठमाडौं फर्किने योजना बनाएर दाङ गएका भट्टराई त्यहाँबाट लखेटिएपछि भने काठमाडौं आएर लुकेर बसेका थिए ।
