कर्णाली प्रदेश सभामा चार वटा विषयगत समिति रहेका छन् । प्रदेश सभा सचिवालयका सचिव जीवराज बुढाथोकीका अनुसार प्रदेश मामिला समितिको सभातिमा प्रदेश सभा सदस्य कल्याणी खड्का, सामाजिक विकास समितिको सभापतिमा धनश्याम भण्डारी, सार्वजनिक लेखा समितिको सभापतिमा जीतबहादुर मल्ल र अर्थ तथा प्राकृतिक स्रोत समितिको सभापतिमा दुर्गबहादुर रावत चयन हुनुभएको छ ।
प्रदेश सभाको पहिलो बैठक चार महिनापछि समितिको सभापतिको निर्वाचन भएको हो । यसअघि सभामुख नन्दा गुरुङले विषयगत समितिको सदस्य मनोनीत गर्नुभएको थियो । समितिका सदस्यबाट सभापतिमा एक/एक जना सदस्यलाई निर्वाचित गरिएको हो । सभामुख गुरुङले आइतबार नै नवनिर्वाचित समितिका सभापतिलाई पद तथा गोपनीयताको शपथ गराउनुभएको थियो ।
प्रदेश सभाका विषयगत समितिले प्रदेश सभाको भूमिकालाई प्रभावकारी बनाउन, नियमित र आकस्मिक कार्यलाई निरन्तर अघि बढाउन भूमिका खेल्छन् । यस्तै प्रदेश सभाबाट समितिमा आएका विधेयकलाई परिमार्जन गर्ने, प्रदेश सभाका काम कारबाहीप्रति प्रदेश सभा सदस्यलाई जागरुक बनाउन तथा जिम्मेवार बनाउन र प्रदेश सरकारलाई जनताप्रति उत्तरदायी र जवाफदेही बनाउन, प्रदेश सरकारका भएगरेका काम कारबाहीको अनुगमन र मूल्याङ्कन गरी आवश्यक निर्देशन, राय सल्लाह दिने महत्वपूर्ण जिम्मेवारी रहेको हुन्छ ।
