सिटौलाले कांग्रेस छाडेर राष्ट्रिय प्रजातन्त्र पार्टी रोजे ।
कांग्रेससँगको ३० वर्षे नाता सम्बन्ध टुटेको थियो ।
विराटनगर ।।
राष्ट्रिय प्रजातन्त्र पार्टी (राप्रपा) का नेता भक्ति सिटौला कोसी प्रदेशसभामा प्रवेश गर्दै गर्दा अभिवादन प्राप्त गर्छन् । कांग्रेसका धेरै प्रदेश सभा सदस्यले जय नेपाल भन्दा जय नेपाल राम्रो संग फर्काउँछन् ।
२०३६-०३७ तिर नेपाल विद्यार्थी संघ हुँदै कांग्रेसको मूलधारको राजनीतिमा प्रवेश गरेका सिटौलाले २०७० मा कांग्रेस छाडेका हुन् । त्यसबेला झापाको निर्वाचन क्षेत्र नम्बर २ मा संविधानसभा सदस्यमा उठ्ने तयारीमा थिए । तर, कांग्रेस नेतृत्वले टिकट दिएन । क्षेत्र नम्बर २ मा उनको सट्टा उद्धव थापा उमेदवार बनाइए ।
‘पार्टी नेतृत्वले काविल भएर पनि भेदभाव गर्दै बेवास्ता गरेपछि’ सिटौलाले कांग्रेस छाडेर राष्ट्रिय प्रजातन्त्र पार्टी रोजे । त्यतिबेला संविधानसभा सदस्यमा राप्रपाबाट मनोनयन दर्ता गराएपछि कांग्रेससँगको ३० वर्षे नाता सम्बन्ध टुटेको थियो ।
प्रदेश सरकार
एमाले नेतृत्वको सरकारका मुख्यमन्त्री हिक्मत कार्कीले असार १५ गते विश्वासको मत लिन नसकेपछि गठबन्धनले कांग्रेसका उद्धव थापालाई मुख्यमन्त्री बनाउने निर्णय गरेको छ । तर, संसदीय अंक गणितको हिसाबले राप्रपालाई साथ नलिइ सहज सरकार बनाउन कांग्रेसलाई हम्मे छ ।
विगतमा कांग्रेसबाट ‘अपमानपूर्ण ढंगले’ बर्हिगमित सिटौलाले ‘के कांग्रेसलाई साथ देलान् ?’ आम राजनीतिक वृत्तमा अहिले चर्चा चुलिएको छ ।
केन्द्रीय स्तरमा कांग्रेस सभापति शेरबहादुर देउवा र राप्रपाका राष्ट्रिय अध्यक्ष राजेन्द्र लिङ्दनेबीच छलफल भए पनि कुन मोडालिटीमा सरकार बन्ने ? र राप्रपाको अवस्था के हुने ? भन्ने टुंगो लाग्न सकेको छैन । एमालेको साथ लिएर निर्वाचनमा विजयी भएको राप्रपाले गठबन्धनलाई साथ दिने नदिने निर्णय हुन बाँकी छ ।
राप्रपा कोसी प्रदेश संसदीय दलका नेता तथा काम चलाउ सरकारका मन्त्री सिटौलाले गठबन्धनमा सामेल भई सरकारमा जाने विषयमा ठोस छलफल हुन अझै बाँकी रहेको बताएका छन् ।
सरकारको ‘नेतृत्व कसले गर्ने, व्यक्ति को हुने ?’ जस्तो विषयमा पहिले छलफल नभएको भन्दै परिस्थिति हेरेर राप्रपा अघि बढ्ने बताएका छन् । “यसबारे निर्णय गर्ने जिम्मा राष्ट्रिय अध्यक्ष लिङ्देनलाई दिइएको छ । हामीले प्रदेशस्तरमा गठबन्धन दलसँग अहिले छलफल गरेका छैनौं,” उनले भने ।
राप्रपाको साथ पाए गठबन्धनले ५२ सांसदको समर्थनसहित सहज ढंगको सरकार बनाउन सक्छ । नपाए सरकार गठन भए पनि ३० दिनपछि विश्वासको मत लिँदा अप्ठ्यारो हुनसक्छ । माओवादी केन्द्रका सभामुखसहित गणना गर्दा ४७ मत पुग्छ । कोसीमा कांग्रेसका २९, माओवादी केन्द्रका १३, नेकपा (एकीकृत समाजवादी) का चार र जसपाका एक सांसद छन् । एमालेसँग आफ्नो ४० सहित राप्रपाका ६ सांसद छन् ।
