काठमाडौं उपत्यकाको फोहोर पाँच दिनदेखि विसर्जन गरिएको छैन । नुवाकोट र धादिङको सिमानामा पर्ने बन्चरेडाँडास्थित ल्यान्डफिल साइटमा फोहोर विसर्जनमा अवरोध गरिएको हो । गएको सोमबारदेखि नुवाकोटको ककनी गाउँपालिका-२ र धादिङको धुनीबेँसी नगरपालिका-१ का स्थानीयवासी सडकमा उत्रिएर फोहोरका गाडीलाई अघि बढ्न रोकेका छन् ।
फोहोरको दुर्गन्धले आफूहरूलाई गाह्रो भएको भन्दै उचित व्यवस्थापन गर्नुपर्ने उनीहरूले माग गरेका छन् । संघ सरकार र काठमाडौं महानगरपालिकासित यसअघि भएका सहमति कार्यान्वयन नभएको भन्दै स्थानीयले अवरोध गरेका हुन् ।
यसैबीच, ल्यान्डफिल साइटमा यसअघि फालिएका फोहोर माटो हालेर पुर्ने र दुर्गन्ध कम गर्ने कार्य भइरहेको ककनी गाउँपालिकाका अध्यक्ष सुमन तामाङले जानकारी दिए ।
“यसअघि फालिएका फोहोर दुर्गन्ध कम गर्न क्यापिङ गर्ने कार्य भइरहेको छ, माटो हालेर त्यसलाई ढाकिँदै छ । हिजो र आजसम्म ढाक्ने काम सकिन्छ होला,” उनले भने ।
गएको बुधबार सहरी विकास मन्त्रालयमा जनप्रतिनिधिसहित स्थानीयवासी छलफलका लागि आएका थिए । अध्यक्ष तामाङका अनुसार मन्त्रालयका तर्फबाट अनौपचारिक रूपमा छलफलका लागि बोलाइएको थियो । त्यसक्रममा दुई दिनभित्र फोहोरलाई ‘क्यापिङ’ गर्ने मौखिक सहमति भएको उनले जानकारी दिए ।
त्यसपछि फोहोरको दुर्गन्ध कम गर्न हिजोदेखि क्यापिङ गरिँदै छ । क्यापिङ गरिसकेपछि तत्काललाई फोहोर विसर्जनमा अवरोध नगरिने उनको विश्वास छ ।
“क्यापिङ गरिसकेपछि स्थानीयले फोहोर विसर्जन गर्न दिनुहुन्छ होला । मन्त्रालयमा लिखित सहमति नभएको भनेर उहाँहरू असन्तुष्ट त हुनुहुन्छ, तर अहिले दुर्गन्ध कम गरेपछि फोहोर फाल्न दिनेजस्तो हामीले बुझेका छौँ,” उनले भने ।
मन्त्रालयले आफूहरूसित समन्वय गरेर काम गरिरहेको उनले बताए । काठमाडौं महानगरपालिकाले भने अहिले कुनै समन्वय नगरेको उनको गुनासो छ । अप्ठ्यारो पर्दा मात्र महानगरले सम्झिने गरेको उनको भनाइ छ ।
काठमाडौं महानगरका जनप्रतिनिधिले भने फोहोरको सहज व्यवस्थापनका लागि आफूहरू लागिपरेको जिकिर गरेका छन् । महानगरका प्रवक्ता नवीन मानन्धरले स्थानीयको अवरोधका कारण पाँच दिनयता फोहोर विसर्जन गर्न नसकिएको बताए । “दुर्गन्धित भयो भन्ने उहाँहरूको कुरा छ, कसरी व्यवस्थापन गर्ने भनेर हामी लागिपरेका छौँ,” उनले भने ।
