राष्ट्रियसभा बैठक भोलि,नेम्वाङको निधनप्रति शोक प्रस्ताव पारित गर्ने
साझा परिवेश
बुधबार, भदौ २७, २०८० १६:२२
काठमाडौं : संघीय संसदअन्तर्गतको राष्ट्रियसभा बैठक भोलि दिउँसो २ बजेर ३१ मिनेटमा बस्ने भएको छ। बैठकमा संविधानसभा अध्यक्ष एवं नेकपा एमालेका उपाध्यक्ष सुवास नेम्वाङको निधनप्रति शोक प्रस्ताव पारित गर्ने कार्यसूची छ।
यसअघि भदौ २२ गते बसेको राष्ट्रियसभा बैठक अनिश्चितकालका लागि स्थगित भएको थियो।
पूर्वसभामुख समेत रहेका एमाले सांसद नेम्वाङको मंगलबार बिहान १ : ३० बजेतिर हृदयघातबाट निधन भएको थियो।
उनको पार्थिव शरीर दुई दिन एमाले पार्टी कार्यालय च्यासलमा राखेर आज निजी निवास बालुवाटार लगिएको छ।
नेम्वाङको भोलि बिहान ११ बजे पशुपतिस्थित आर्यघाटमा राजकीय सम्मानका साथ अन्त्येष्टि गरिनेछ।
उनको निधनमा सरकारले भोलि सार्वजनिक बिदा दिने निर्णय गरेको छ।
