आपसी विवादमा सुन पसलेले हाने तेजाव, वृद्धसहित दुईजना घाइते
साझा परिवेश
बुधबार, अशोज ३, २०८० ११:२३
धादिङको गजुरी गाउँपालिका-२ स्थित मलेखुमा एकजना सुनचाँदी पसलेले तेजाव हान्दा दुईजना घाइते भएका छन्।
स्थानीय प्रविण विकले आफ्नै सुनचाँदी पसलमा रहेको तेजाव प्रहार गर्दा दुईजना घाइते भएका बागमती प्रदेश प्रहरी कार्यालयले जानकारी दिएको छ।
मंगलबार दिउँसो सवा २ बजेको समयमा विकले सञ्चालन गरेको भद्रकाली सुन चाँदी पसलमा मादक पदार्थ पिएका एकजना व्यक्ति आएर विवाद गरेका थिए।
विवाद बढ्दै गएपछि आक्रोशित पसल सञ्चालक विकलले गहना निर्माणका लागि प्रयोग गर्न राखिएको तेजाव हानेका थिए।
बेनिघाट रोराङ गाउँपालिका-३ मा बस्ने ३२ वर्षीय विकले हानेको तेजावले लागेर बेनिघाट रोराङ गाउँपालिका-३ रातमाटा बस्ने १८ वर्षीय दिपेश क्षत्री र उक्त पालिकाकै ६३ वर्षीय डम्बरबहादुर पुलामी घाइते भएका हुन्।
क्षत्रीको शरीरमा तेजावले केही ठाउँ जलेको छ। उनको उपचारपछि अवस्था सामान्य रहेको प्रहरीले जनाएको छ। पुलामीको भने अनुहार र शरीर पनि जलेकाले थप उपचारका लागि कीर्तिपुर बर्न अस्पताल पठाइएको छ।
