अर्को सातादेखि हुने खेलअघि नेपालका बायाँ हाते स्पिनर ललित राजवंशी घाइते भए
शल्यक्रियापछि ललित कम्तीमा ६ देखि १२ साता मैदान बाहिर रहने
उनको बिहीबार बिहान बीएन्डबी अस्पताल ग्वार्कोमा शल्यक्रिया गर्ने तयारी हुँदै
काठमाडौँ ।।
१९ औं एसियन गेम्सअघि नेपाली राष्ट्रिय क्रिकेट टोलीलाई ठूलो झट्का लागेको छ। अर्को सातादेखि हुने खेलअघि नेपालका बायाँ हाते स्पिनर ललित राजवंशी घाइते भएका छन्। बुधबार अभ्यासका क्रममा फिल्डिङ गर्ने क्रममा ललितको क्लोज राइट क्लाभिकल फ्राक्चर डाइगनोस (ब्यूटिबोन) भएको छ। ललितको बुधबार नै बीएण्डबी अस्पतालमा शल्यक्रिया गरिँदैछ। शल्यक्रियापछि ललित कम्तीमा ६ देखि १२ साता मैदान बाहिर रहनेछन्।
दायाँ हातको ब्युटीबोनमा चोट लागेपछि उनलाई बुधबार नेशनल अस्पताल कलंकी लगिएको थियो। त्यहाँ उपचार हुन नसकेपछि उनको बिहीबार बिहान बीएन्डबी अस्पताल ग्वार्कोमा शल्यक्रिया हुँदैछ। घाइते भएसँगै ललितले १९ औँ एसियाड गुमाउनेछन्। एसियाडमा पुरुष क्रिकेटका खेलहरु २७ सेप्टेम्बरदेखि ८ अक्टोबर सम्म हुँदैछ।
समूह ‘ए’ मा रहेको नेपालले १० गते बुधबार मंगोलिया र १४ गते मालदिभ्ससँग खेल्दैछ। समूहका शीर्ष टोलीले अन्तिम आठमा स्थान बनाउनेछन्। क्वार्टरफाइनमा भारत, पाकिस्तान, श्रीलंका, बंगालदेशले सिधै स्थान बनाइसकेका छन्।
