सर्लाहीको सदरमुकाम मलंगवामा लगाइएको कर्फ्यू आइतबार बिहान ८ बजेदेखि खुलेको छ । तर ७२ घण्टासम्म निषेधाज्ञा भने जारी गरिएको छ । कर्फ्यू खुलेपछि बजार, पसल भने खुल्न थालेका छन् भने जनजीवन सामान्य बनेको छ । सदरमुकाम मलंगवामा दुई समुदायबीच झडप तथा कुनै अप्रिय घटना हुन नदिन स्थानीय प्रशासनले शनिबार साँझ ५ बजेदेखि आइतबार बिहान ८ बजेसम्मका लागि कर्फ्यू आदेश जारी गरेको थियो ।
कर्फ्यू आदेश जारी गरिएको समयमा स्थिति सामान्य रहेको बताउँदै प्रमुख जिल्ला अधिकारी इन्द्रदेव यादवले कर्फ्यू खुलेको जानकारी दिए । तर सम्भावित घटना हुन नदिन स्थानीय प्रशासनले ७२ घण्टाका लागि निषेधाज्ञा जारी गरेको छ ।
भेला, जुलुस, धर्ना, आमसभालगायतका कार्यक्रम गर्न नपाइने गरी निषेधाज्ञा जारी गरिएको प्रमुख जिल्ला अधिकारी यादवले बताए । प्रहरी उपरीक्षक नरेशराज सुवेदीले निषेधाज्ञामा मानिस हिँडडुल गर्न पाउने, बजार पसल खोल्न पाउन, तर भेला, जुलुसलगायतका उच्छृंखल गतिविधि गर्न नपाइने जानकारी दिए ।
शुक्रबार साँझ जन्माष्टमीको मूर्ति विसर्जन गर्ने क्रममा दुई समुदायबीच झडप हुँदा मलंगवा अशान्त बनेको थियो । शनिबार बिहानदेखि मलंगवामा उच्छृंखल गतिविधि बढेर स्थिति नियन्त्रण भन्दा बाहिर जान थालेपछि स्थानीय प्रशासन ऐन २०२८ को दफा ६ ‘क’ को १ र ३ बमोजिम जिल्ला प्रशासनले कर्फ्यू लगाएको थियो ।
