मलंगवा घटना अनुगमनको लागि आयोगले सर्लाही पठायो उच्चस्तरीय टोली
साझा परिवेश
आइतवार, अशोज ७, २०८० १६:0५
काठमाडौँ / मधेसी आयोगले सर्लाहीको मलंगवामा भएको घटनाको सत्यतथ्य पत्ता लगाउन एक उच्चस्तरीय अनुगमन टोली पठाएको छ ।
शुक्रबार गणेश चतुर्थिको मुर्ती सेलाउने क्रममा दुई समुदायबीच झडप भएको र त्यसपछि घटनाले उग्र रुप लिएसँगै गम्भीर ध्यानाकर्षण गराउँदै आयोगले घटनास्थलमा अनुगमन टोली पठाएको हो ।
अध्यक्ष डा.विजयकुमार दत्तले यस्ता घटनाहरुप्रति आयोग गम्भीर रहेको बताउँदै दोषीलाई कानुनी कारवाहीको दायरामा ल्याउन आयोगले समय-समयमा स्थानीय प्रशासनलाई निर्देशन दिएको बताए । उनले यसबारे संघीय, प्रदेश तथा स्थानीय सरकारलाई सचेत समेत गराइएको बताए ।
आयोगले कानुन विपरित कार्य गर्ने जो-कोही लाई पनि कानुनी दायरा भित्र यथाशिघ्र ल्याउन स्थानीय प्रशासनलाई सचेत गराएको छ । आयोगले सो घटनामा घाइते भएकाहरुको उपचारको लागि सरकारलाई तुरुन्त आवश्यक व्यवस्था मिलाउन समेत ध्यानकर्षण गराएको छ । आयोगले अनुगमन टोलीलाई आवश्यक सहयोग गरिदिन समेत सबै सरोकारवालाहरुलाई आग्रह गरेको छ ।
