इजरायलमा रहेका नेपालीहरुलाई स्वदेश फर्काउन राष्ट्रपतिको आग्रह
साझा परिवेश
सोमवार, अशोज २२, २०८० १४:३३
राष्ट्रपति रामचन्द्र पौडेलले इजरायलमा रहेका नेपाली नागरिकप्रति चासो व्यक्त
मारिएका नेपाली विद्यार्थीहरूप्रति श्रद्धान्जली व्यक्त गर्दै राष्ट्रपतिले परिवारप्रति सहानुभूति प्रकट
सुरक्षित स्थानमा रहेका नेपालीलाई स्वदेश फर्काउन आग्रह गर्दै
काठमाडौं ।।
राष्ट्रपति रामचन्द्र पौडेलले इजरायलमा रहेका नेपाली नागरिकहरूको आवश्यकतानुसार उद्धार, स्वदेश फिर्ती, मृतकका परिवारलाई राहत लगायतका विषयमा चासो व्यक्त गरेका छन् । राष्ट्रपति पौडेलले परराष्ट्रमन्त्री एनपी साउदलाई शीतल निवासमा बोलाएर इजरायलमा रहेका नेपाली नागरिकहरूको अवस्थाबारे चासो व्यक्त गरेका हुन् ।
हमासको आक्रमणमा परि इजरायलमा मारिएका नेपाली विद्यार्थीहरूप्रति श्रद्धान्जली व्यक्त गर्दै राष्ट्रपतिले परिवारप्रति सहानुभूति प्रकट गरेको उनका प्रेस सल्लाहकार किरण पोखरेलले जानकारी दिए । राष्ट्रपतिले घाइतेहरूको शीघ्र स्वास्थ्य लाभको कामना गर्दै उपचारमा विशेष ध्यान दिन परराष्ट्रमन्त्रीमार्फत सरकारको ध्यानाकर्षण पनि गराएका छन् । राष्ट्रपति पौडेलले सुरक्षित स्थानमा रहेका नेपालीलाई स्वदेश फर्काउने काम तत्काल अगाडि बढाउन पनि आग्रह गरेको प्रेस सल्लाहकार पोखरेलले जानकारी दिए ।
