नेपालमा योवर्ष डेंगी संक्रमितको संख्या ४० हजारनजिक
जनवरीयता १३ अक्टोबरसम्म ३९ हजार ३६० जना संक्रमित भए
सबैभन्दा कम कर्णाली प्रदेशका १३९ जना संक्रमित
काठमाडौं ।।
नेपालमा योवर्ष डेंगी संक्रमितको संख्या ४० हजारनजिक पुगेको छ । इपीडीमियोलोजी तथा रोग नियन्त्रण महाशाखा (इडीसीडी)को तथ्यांकअनुसार जनवरीयता १३ अक्टोबरसम्म ३९ हजार ३६० जना संक्रमित भएका छन् । अक्टोबरका १३ दिनमा मात्रै ६ हजार ९१ संक्रमित थपिएका छन् । डेंगीबाट जुलाइयता २० जनाको मृत्यु भएको पुष्टि भएको छ ।
इडीसीडीका अनुसार सबैभन्दा धेरै कोसी प्रदेशमा २३ हजार ९७१ जना संक्रमित भएका छन् । त्यस्तै, गण्डकीमा सात हजार ८५३, वाग्मतीमा चार हजार ९७०, सुदूरपश्चिममा एक हजार १४२, लुम्बिनीमा ६९३ तथा मधेसमा ५९२ जना संक्रमित भएका छन् । सबैभन्दा कम कर्णाली प्रदेशका १३९ जना संक्रमित भएको इडीसीडीको तथ्यांक छ । काठमाडौं उपत्यकाका तीन जिल्लामा हालसम्म एक हजार ३८० जना संक्रमित भएको इडीसीडीले जनाएको छ ।
