शुक्रबार कार्यालय खुले पनि अधिकांश कर्मचारी अनुपस्थित

काठमाडौं । विजयादशमीको ६ दिन बिदा सकिएर शुक्रबारदेखि सरकारी कार्यालय खुलेका छन् । शुक्रबार बिहानदेखि सरकारी कार्यालय खुले पनि अधिकांश कर्मचारी अनुपस्थित भएका राष्ट्रिय सर्तकता केन्द्रले जनाएको छ ।

केन्द्रका अनुसार सिंहदरबारमा रहेका प्रधानमन्त्री तथा मन्त्रिपरिषद्को कार्यालयसहित सबै मन्त्रालय, सबैजसो आयोग, सचिवालय तथा कार्यालयमा थोरै संख्यामा कर्मचारी उपस्थित भएको केन्द्रले जनाएको छ । कार्यालयका सहसचिव एवक प्रवक्ता राजेन्द्रकुमार पौडेलका अनुसार काठमाडौं उपत्यकामा रहेका कर्मचारी शुक्रबार कार्यालयमा हाजिर भएको भए पनि उपत्यका बाहिर रहेका कर्मचारी भने उपस्थित हुन सकेनन् ।

उनले भने, ‘दशैको बिदा बिहीबारसम्म थियो । आज एक दिन शुक्रबार मात्रै कार्यालय खुल्ला भयो र भोलि फेरी शनिबार सार्वजनिक बिदा नै भइहाल्यो । दशैको बेला सबै कार्यक्षेत्रमा फर्किने भएकाले सवारी साधनको पनि अभाव नै हुन्छ । भनेबेला फर्किन सकिदैन । त्यसैले आइतबारसम्म सबैजसो कर्मचारी आइपुग्नुहुन्छ होला ।’

प्रवक्ता पौडेलले केहि वर्ष पहिले दसैंको बिदा १५ दिन रहेकोमा अहिले आधा भन्दा बढी घटाएर ६ दिन मात्रै राखिएको र कर्मचारीले त्यसलाई स्वीकारेर अघि बढेकाले शुक्रबार हाजिर भए कि भएनन् भनेर राष्ट्रिय सर्तकता केन्द्रले छड्के जाँच नगरेको बताए । उनले कर्मचारी मात्रै नभएर सेवाग्राही पनि एकदमै कम आउने गरेकाले कर्मचारीलाई शुक्रबार नै हाजिर हुनका लागि सम्बन्धित निकायले बाध्य नपारेको बताए ।

• संसद विघटन