शुक्रबार साँझ ११ बजे जाजरकोट केन्द्रविन्दु भएर गएको भूकम्पमा परी १२८ जनाको मृत्यु भएको छ भने सयौं घाइते भएका छन् । त्यस क्षेत्रका धेरै घरहरु तहसनहस भएको अवस्था छ । अहिले सुरक्षाकर्मीदेखि चिकित्सकसम्म उद्दार र उपचारमा खटिरहेका छन् । यस्तैमा, विभिन्न क्षेत्रका व्यक्ति तथा संस्थाले भूकम्प प्रभावितका लागि आर्थिकदेखि खाद्यान्न-लत्ताकपडा सहयोग गरिरहेका छन् ।
अभिनेता तथा मोडल पल शाहले पनि आर्थिक सहयोगको घोषणा गरेका छन् । उनले आफू संलग्न हाम्रो टिम नेपालको मार्फत् ५० हजार सहयोग गरेको जानकारी फेसबुकमार्फत् गराएका छन् । भूकम्पले धेरै घरहरु भत्किएकाले नागरिकहरु खुला आकाशमुनि बस्न र खानपिनको व्यवस्थापन नभएको र घाइतेहरूलाई छिटो उद्दार गर्न उनले सम्बन्धित निकायलाई आग्रह समेत गरेका छन् ।
अभिनेत्री स्वस्तिमा खड्काले भने भूकम्पपछि नेताहरु हेलिकप्टरबाट जाजरकोट जान थालेकोप्रति कटाक्ष गर्दै फेसबुकमा लेखेकी छन्, ‘यस्तो दुःखद अवस्थामा हेलिकोप्टर लिएर भ्रमणमा निस्किनुहुने नेताज्यूहरूलाई अनुरोध छ कि तपाईंहरु उड्ने हेलिकोप्टरमा उद्धारकर्मी र राहत सामाग्री पठाइदिनुस् । पीडितलाई तपाईंको अनुहारभन्दा उद्धारकर्मी र राहतकर्ताको अनुहार आफ्नो लाग्छ ।’
निर्देशक तथा अभिनेता आकाश अधिकारीले आफूसँग भएको ५०/७० पिस ठूला त्रिपालहरु भूकम्प प्रभावित क्षेत्रमा सहयोग गरेका छन् । अभिनेत्री करिश्मा मानन्धरले भूकम्प पीडितको राहत, उपचार र उद्दारमा कमी हुन नदिन सरकारसँग आग्रह गरेकी छन् । अन्य कलाकारहरुले पनि भूकम्पमा ज्यान गुमाउनेहरुप्रति श्रद्धाञ्जली अर्पण गर्दै घाइतेहरुको स्वास्थ्य लाभको कामना गरेका छन् ।
