काठमाडौं । सरकारको खातामा एक खर्ब बढेको छ । गत असारमा ७१ अर्ब ९८ करोड रहेकामा अहिले एक खर्ब थपिएर सरकारको खातामा एक खर्ब ७१ अर्ब रुपैयाँ रहेको देखिएको हो ।
सरकारलाई राजस्व प्राप्त भएपनि विकास निर्माणको भुक्तान गर्नुपर्ने रकम नगरेकाले खातामा पैसा बढेको देखिएको हो । ६ अर्ब रुपैयाँबराबरको निर्माण व्यवसायीको रकम भुक्तानी हुन बाँकी रहेको व्यवसायी बताउँछन् ।
यो वर्ष सरकारले १४ खर्ब २२ अर्ब राजस्व उठाउने लक्ष्य राखेकामा दुई खर्ब ७६ अर्ब अर्थात् लक्ष्यको १९.४४ प्रतिशत उठेको छ । जबकि गत वर्ष यहि समयमा दुई खर्ब ६० अर्ब अर्थात १८.५८ प्रतिशत रकम मात्रै उठेको थियो ।
सरकारले विकास निर्माण अघि नबढाउँदा र राष्ट्र बैंकले विदेशी मुद्रा सञ्चितिमा आएको सहजताअनुसार बजार चलायमान गराउने प्रयास नगरेको व्यवसायी बताउँछन् । २०८० असार मसान्तमा १५ खर्ब ३९ अर्ब ३६ करोड रुपैयाँबराबर रहेको कुल विदेशी विनिमय सञ्चिति ६.७ प्रतिशतले वृद्धि भई असोज मसान्तमा १६ खर्ब ४३ अर्ब ९ करोड पुगेको छ ।
