जाजरकोट भूकम्प : पशुपक्षी मरेकाले किसानलाई ठूलो आर्थिक क्षति
साझा परिवेश
बुधबार, कार्तिक २९, २०८० १७:२९
काठमाडौं । जाजरकोट र रुकुम पश्चिममा गएको भूकम्पले धेरै घरपालुवा पशुपक्षी मरेकाले किसानले ठूलो आर्थिक क्षति सहनुपरेको पशुपक्षी विज्ञ तथा चिकित्सकहरूले बताएका छन् ।
प्रभावित क्षेत्रमा तत्काल पशु चिकित्सकहरूको टोली पठाएर अवस्था अध्ययन गर्नु पर्ने उनीहरूले बताएका छन् । पशु घाइते हुँदा र मर्दा पहाडी जिल्लाका किसानले आयआर्जनको स्रोत गुमाउनु परेको हुँदा तिनको उपचार गर्न सके किसानलाई केही राहत पुग्ने वरिष्ठ पशु चिकित्सक पुष्पराज श्रेष्ठ बताउँछन् । उनी भन्छन्, ‘गोठहरू भत्किएर दबिएको हुन्छ । चोटपटक लागेको हुन्छ । त्यस्ता पशुपक्षीहरूलाई तुरुन्तै उपचार गर्ने व्यवस्था गर्नु पर्छ ।’
जाजरकोट भूकम्पमा परी अहिलेसम्म जाजरकोट र रुकुम पश्चिममा करिब २ हजार पशुपक्षी मरेको र त्यति नै सङ्ख्यामा घाइते भएको अनुमान गरिएको छ ।
