विश्वकप क्रिकेटको उपाधिका लागि आज भारत र अस्ट्रेलिया प्रतिस्पर्धा गर्दै

काठमाडौं । आईसीसी एकदिवसीय विश्वकप क्रिकेटको उपाधिका लागि आज भारत र अस्ट्रेलियाबीच प्रतिस्पर्धा हुँदैछ ।

अहमदाबादस्थित विश्वकै सर्वाधिक एक लाख ३० हजार दर्शक क्षमता भएको नरेन्द्र मोदी स्टेडियममा नेपाली समयअनुसार दिउँसो सवा २ बजे फाइनल खेल सुरु हुनेछ ।

यी दुई टिम २० वर्षपछि फेरि उपाधिका लागि आमनेसामने हुन लागेका हुन् । घरेलु टोली १२ वर्षपछि विश्वकप क्रिकेटको उपाधि उचाल्ने दाउमा छ भने पाँच पटकको च्याम्पियन अस्ट्रेलिया कीर्तिमान बनाउने लक्ष्यमा हुनेछ ।

सन् २००३ मा दक्षिण अफ्रिकाको जोहानेसबर्गमा भारतलाई एक सय १५ रनले पराजित गर्दै अस्ट्रेलियाले तेस्रोपटक ओडीआई विश्वकप च्याम्पियन बनेको थियो । आज भारतका लागि उक्त हारको बदला लिँदै उपाधि हात पार्ने अवसर हुनेछ । भारतले पछिल्लो पटक सन् २०१५ र अस्ट्रेलियाले २०१५ मा उपाधि जितेका थिए ।

जारी प्रतियोगितामा घरेलु टोली अपराजित छ भने अस्ट्रेलियाले सानदार पुनरागमन गर्दै फाइनलको यात्रा तय गरेको हो ।

प्याट कमिन्सको टोली अस्ट्रेलियाले बिहीबार राति लो स्कोरिङ सेमिफाइनलमा दक्षिण अफ्रिकामाथि रोमाञ्चक जित दर्ता गर्दै फाइनलमा भारतसँगको भेट पक्का गरेको हो । अस्ट्रेलियाले २ सय १३ रनको लक्ष्य १६ बल बाँकी हुँदा सात विकेट गुमाएर पूरा गरेको थियो ।

भारतले न्युजिल्यान्डको चुनौती एक सय ६० रनले समाप्त गरेको थियो । सुरुवाती दुई खेलमा भारत र दक्षिण अफ्रिकासँग पराजित अस्ट्रेलियाले त्यसपछिका आठ खेलमा लगातार जित हात पार्दै फाइनल यात्रा तय गरेको हो । अस्ट्रेलिया पुनरागमनका लागि अब्बल मानिन्छ । तर म्याच विनरले भरिपूर्ण अपराजित भारतलाई हराउन सहज हुने छैन । यसै वर्ष भारतलाई नै हराएर अस्ट्रेलियाले टेस्ट च्याम्यिनसिपको उपाधि जितेको थियो ।

अस्ट्रेलियाले २७ वर्षयता खेलेका कुनै पनि आईसीसी प्रतियोगिताको फाइनल हारेको छैन । उसले अन्तिम पटक सन् १९९६ विश्वकपको फाइनलमा श्रीलंकासँग ७ विकेटको हार बेहोरेको थियो । त्यसयता उसले तीन एकदिवसीय विश्वकप, एक टी–२० आई विश्वकप, एक टेस्ट च्याम्यिनसिप र दुई च्यापियन्स ट्रफी जितेको छ । उसले एकदिवसीय विश्वपकमा हालसम्म खेलेका ७ मध्ये ५ फाइनल जितेको छ ।

भारतले सन् २०११ को विश्वकप जितेयता लगातार २ टेस्ट च्याम्यिनसिप फाइनल, टी–२० आई विश्वकप फाइनल र च्यापियन्स ट्रफीको फाइनलमा हार बेहोरेको छ । तर यो पटकको भारतीय टोली उच्च लयमा छ । कप्तान रोहित शर्मासँग विराट कोहली, श्रेयस ऐअर र केएल राहुल जस्ता र्फममा रहेका ब्याटर छन् । मोहम्द सामी, मोहम्मद सिराज र जसप्रित बुमराहले बलिङ सम्हाल्नेछन् । बिराटे उच्च रनकर्ताको सूचीको पहिलो स्थानमा छन । उनले ७ सय ११ रन बनाइसकेका छन् । सुरुवातका चार खेलमा बेन्चमा रहेका सामी २३ विकेटसहित शीर्ष स्थानमा छन् । रोहित र शुभमन गिलले पुरै विश्वकपमा पहिलो पावर प्लेमा विपक्षी बलरलाई हाबी हुन दिएका छैनन् ।

अर्कातर्फ कमिन्सको टोली हारको मुखबाट जित निकाल्न सिपालु छ । ग्लेन म्याक्सवेल, डेभिड वार्नर र ट्राभिस हेडको लय र भारतीय कण्डिसनमा एडम जाम्पाको स्पिनले क्षणभरमै खेलको नजिजामा फेरबदल ल्याउन सक्छ ।

एकदिवसीय विश्वकपमा भारतले अस्ट्रेलियाविरुद्ध १३ खेल खेलेको छ । जसमा अस्ट्रेलियाले ८ खेल जित्दा भारतले केवल ४ खेलमा जित हात पारेको छ । जारी विश्वकपमा अहमदाबादमै भारतले पाकिस्तान र अस्ट्रेलियाले इङल्यान्डलाई हराएका थिए ।

• संसद विघटन