मेलम्चीको पानी ल्याएर काठमाडौंमा वितरण गर्नु पर्ने माग गर्दै उपत्यका संघर्ष समितिले काठमाडौंमा प्रदर्शन गरेको छ ।काठमाडौं उपत्यका मेलम्ची खानेपानी आयोजनाले मेलम्चीको पानी ल्याउन पहल नगरेको भन्दै उपभोक्ताहरुले संघर्ष समिति नै गठन गरेर प्रदर्शन गर्दै आएका छन् । उपभोक्ताहरु रित्ता गाग्री बोकेर नै प्रदर्शनमा सहभागी भएका थिए ।
मेलम्ची राष्ट्रिय गौरवको आयोजना भए पनि सरकारले आयोजना पूरा नगरेका कारण आन्दोलनमा उत्रिनु परेको गर्ने संघर्ष समितिका संयोजक गोविन्दराज पन्तले जानकारी दिए । संघर्ष समितिले आफूहरुले पटक पटक मुहान क्षेत्रको निरीक्षण गरेको दाबी गर्दै त्यहाँ कुनै समस्या नभए पनि सरकारले पानी ल्याउन पहल नगरेको आरोप लगाएको छ ।
मनसुन सुरु हुनुअघि मेलम्चीको सुरङ बन्द गरेर पानी ल्याउन रोकिएको थियो । मनसुन सकिएको लामो समय हुँदा पनि मेलम्चीको पानी काठमाडौं ल्याइएको छैन । जसले गर्दा काठमाडौंमा उपभोक्ताहरु पिउने पानीको समस्यामा छन् ।
