सभामुखका लागि राष्ट्रिय प्रजातन्त्र पार्टीले अम्बरबहादुर विष्टलाई अघि सार्यो
तत्कालिन सभामुख बाबुराम गौतमले राजीनामा दिएपछि….
एक साताभित्र निर्वाचन गर्ने सत्ता गठबन्धन दलको तयारी
विराटनगर ।।
कोशीमा सभामुखका लागि राष्ट्रिय प्रजातन्त्र पार्टीले आफ्ना प्रदेशसभा सदस्य अम्बरबहादुर विष्टलाई अघि सारेको छ । सत्ता गठबन्धनमा रहेका दलले राप्रपालाई सभामुख पद लिन प्रस्ताव गरेको थियो । त्यसपछि विष्टले आफ्नो दलबाट सभामुख हुने सांसदको रुपमा विष्टको नाम दिएको हो । एक–दुई दिनभित्र औपचारिक निर्णय गर्ने तयारी भएको राप्रपा संसदीय दलका नेता भक्तिप्रसाद सिटौलाले जानकारी दिए । राजनीतिमा नाटकीय परिवर्तन नभए विष्ट एक साताभित्र कोशीको सभामुख बन्नेछन् । तत्कालिन सभामुख बाबुराम गौतमले राजीनामा दिएपछि १६ साउनयता कोशी प्रदेश सभामुखविहीन छ । रिक्त रहेको सभामुख पदका लागि एक साताभित्र निर्वाचन गर्ने सत्ता गठबन्धन दलको तयारी छ ।
स्रोतका अनुसार सत्ता गठबन्धन दलका नेताले राप्रपा संसदीय दलका नेता भक्ति सिटौलालाई सभामुख बन्नका लागि प्रस्ताव गरेका थिए । तर सिटौलाले आफू नभई दलका ज्येष्ठ सदस्य विष्टको नाम सभामुखमा प्रस्ताव गरेका हुन् । ‘हाम्रो एक जना दाइ हुनुहुन्छ वरिष्ठ (अम्बरबहादुर विष्ट)’, सिटौलाले भने, ‘पाउने नपाउने टुङ्गो भएपछि उहाँलाई अघि सार्छाैं ।’ राप्रपा र सत्ता गठबन्धन दलले विष्टलाई सर्वसम्मत सभामुख बनाउन चाहेका छन् । त्यसका लागि एमालेसँग छलफल गर्ने माओवादी केन्द्र संसदीय दलका नेता इन्द्रबहादुर आङ्बोले बताए । एमालेले उपसभामुख सृजना दनुवारलाई नै सभामुख बनाउन खोजेको छ । तर गठबन्धन दल राप्रपाको विकल्प खोज्न तयार छैनन् ।
‘हामीले इन्टरनेशनल प्राक्टिस पनि हेर्यौं, अपोजिसनले सभामुख लिने प्राक्टिस भएका रहेछन्’, सिटौलाले भने,‘सभामुखलाई सर्वसम्मत बनाउने मनस्थितिमा छौं ।’ एमालेसँग पनि सल्लाह गरेर सर्वसम्मत बनाउने प्रयास गर्ने उनले बताए । सरकारमा जाने योजना भने नरहेको उनले बताए । ९३ सदस्यीय प्रदेशसभामा बहुमतका लागि ४७ मत आवश्यक छ । वर्तमान सत्ता गठबन्धनसँग जम्मा ४७ सांसद छन् । सत्ता गठबन्धनकै दलबाट सभामुख चयन गर्दा सरकारलाई बहुमत नपुग्ने भएकाले रगठबन्धनले राप्रपालाई सभामुखको प्रस्ताव गरेको हो ।सत्ता गठबन्धनमा रहेका दलहरु कांग्रेसको २९, माओवादी केन्द्रको १३, एकीकृत समाजवादीका ४ र जसपाका एक सांसद छन् । प्रतिपक्षमा रहेको नेकपा एमालेको ४० र राप्रपाको ६ सांसद छन् ।
