लगानी गरेर ल्याएको सामान बिक्री गर्न नदिएको आक्रोश
“कि जागिर लगाइदिनुपर्यो, गरिबले एउटा सुन्तला बेचेर पनि खान नपाउने ?” : व्यवसायी
पोखरा ।।
१९औँ लेखनाथ महोत्सवको मूल गेट फुटपाथ व्यवसायीहरूले बन्द गरिदिएका छन् । लेखनाथमा जारी महोत्सवको दोश्रो दिन महानगर प्रहरीले फुटपाथ व्यवसायीहरूले गेटबाहिर बेच्न राखेका फलफूल, लत्ताकपडा लगायतका सामान उठाइदिएको थियो । त्यसको विरुद्धमा नाराबाजी गर्दै उनीहरूले महोत्सवको मूल गेट नै बन्द गरिदिएका हुन् । आक्रोशित उनीहरूले आफूहरूले लगानी गरेर ल्याएको सामान बिक्री गर्न पाउनुपर्ने बताएका थिए । “कि जागिर लगाइदिनुपर्यो, गरिबले एउटा सुन्तला बेचेर पनि खान नपाउने ?” एक महिलाले भनिन् ।
महानगर प्रहरी प्रमुख पुरुषोत्तम थापाले महोत्सव सञ्चालन भएको स्थान बाहिरको बाटोमा व्यापारिक प्रयोजनका अन्य सामाग्री राखिएको हुँदा हटाइएको बताए । हिजो (शनिबार) आफूहरू नै गएर बाहिर व्यवसाय नगर्नुहोस, भित्र स्टलहरू छन, त्यहीँ राख्न भनिएको उनले बताए । “भित्र सामान राख्ने व्यवस्था गरिएको होला, स्टलमा व्यापार गर्नुहोस् भन्यौँ । तर, आजपनि हिजोकै कामलाई निरन्तरता दिनुभएको रहेछ, आज हटाउने काम भएको हो ।” उनले भने । फुटपाथ व्यवसायीहरूले लगाएको गेट खुलाउने विषयमा नेपाल प्रहरीसँग समन्वय भइरहेको उनले बताए ।
