सभामुखले प्रमुख सचेतकसँग वार्ता गर्दै– प्रधानमन्त्रीले सुरुमै सम्बोधन गर्ने तयारी
साझा परिवेश
सोमवार, जेष्ठ २२, २०८० १0:४५
काठमाडौं । सभामुख देवराज घिमिरेले प्रतिनिधि सभाको अवरोध हटाउन छलफल सुरु गरेका छन् ।
बिहान प्रधानमन्त्री पुष्पकमल दाहाल प्रचण्डसँग कुरा गरेका सभामुख घिमिरेले अहिले केहीबेरमै प्रमुख दलका प्रमुख सचेतकहरुसँग छलफल गर्न लागेको उनको सचिवालयले जनाएको छ । बजेट पारित गर्न समयको चाप रहेको स्मरण गराउँदै विपक्षी दलसँग संवाद गर्न सभामुखले प्रधानमन्त्रीसँग आग्रह गरेका थिए ।
सभामुखसँगको संवादमा अध्यक्ष दाहालले सदनमा विपक्षीले उठाएको मागबारे आफू जानकार रहेको बताउँदै आजको संसदमा आफूले प्रष्टीकरण दिने बताएका थिए । “म एमाले अध्यक्ष केपी शर्मा ओलीसहित विपक्षी दलसँग पनि कुरा गर्छु, सरकारका तर्फबाट लचकता र पहल हुन्छ,” प्रधानमन्त्रीले सभामुखलाई विश्वस्त तुल्याएका थिए ।
