प्रसूति सेवाका लागि सरकारले २६ सयभन्दा बढी नर्स उत्पादन गर्ने
साझा परिवेश
बुधबार, पुस ११, २०८० ११:५६
सरकारले दक्ष प्रसूति सेवाका लागि
२ हजार ६०० भन्दा बढी मिडवाइफ नर्स उत्पादन गर्ने
पीसीएल तहका ९०० र स्नातक तहका मिडवाइफ ३७३ पुर्याउने
काठमाडौं ।।
सरकारले दक्ष प्रसूति सेवाका लागि सन् २०३३ सम्ममा दुई हजार ६०० भन्दा बढी मिडवाइफ नर्स (प्रसूतिका लागि तालिम प्राप्त नर्स) उत्पादन गर्ने लक्ष्य राखेको छ । स्वास्थ्य क्षेत्रको लैंगिक समानता तथा सामाजिक समावेशीकरण रणनीति २०८० मा यो लक्ष्य राखिएको हो ।
रणनीतिमा सन् ३०३३ सम्ममा देशभर २ हजार ६५३ मिडवाइफ नर्स उत्पादन गरिने उल्लेख छ । नेपाल नर्सिङ परिषद्को तथ्यांकअनुसार हाल देशभर ६६ जना मात्रै मिडवाइफ नर्स छन् । सन् २०३३ सम्ममा हाल सेवारत नर्सबाट एक हजार ३८० जनालाई मिडवाइफ नर्समा रुपान्तरण गरिने उल्लेख छ । त्यसैगरी पीसीएल तहका ९०० र स्नातक तहका मिडवाइफ ३७३ पुर्याउने लक्ष्य छ ।
मिडवाइफको संख्या वृद्धिसँगै मातृ र नवजात शिशु मृत्युदर घट्ने अपेक्षा राखिएको छ । नेपाल जनसांख्यिक तथा स्वास्थ्य सर्वेक्षण २०२२ (एनडीएचएस) अनुसार प्रत्येक एक हजारमा २१ जना शिशुको जन्मिएको एक महिनाभित्र मृत्यु हुने गरेको छ । मातृ मृत्युदर हाल १५१ रहेकोमा यो संख्या सन् २०३३ सम्म ७० मा झार्ने सरकारको लक्ष्य छ ।
