पक्राउ परेका पहिचानवादी नेताको रिहाईको माग राख्दै मेची राजमार्ग बन्द
साझा परिवेश
बुधबार, पुस १८, २०८० ११:१९
पक्राउ परेका पहिचानवादी नेता आन्जेस राईको रिहाईको माग गदैं प्रदेश १ पुनः नामाङ्कन संयुक्त सङ्घर्ष समितिले आह्वान गरेको बन्दका कारण पूर्वी मेची राजमार्ग ठप्प भएको छ ।
संयुक्त संघर्ष समितिको आव्हानमा बन्दका कारण इलामसहित ताप्लेजुङ,पाँचथरका मेची राजमार्गमा बुधवार बिहानैदेखि यातायात ठप्प हुन पुगेको छ ।बन्दका कारण मेची राजमार्गमा सञ्चालन हुने सबै किसिमका सवारी साधन ताप्लेजुङबाट नछुटेका यातायात व्यवसायीले जनाएका छन् ।
मेची राजमार्गमा यातायात बन्द आह्वानले जिल्लाबाट बाहिरिने र भित्रिने सवारी साधन ठप्प हुँदा यात्रु मारमा परेका छन् । बुधवारका लागि टिकट बुकिङ गरेका यात्रुले गन्तव्यमा जान नपाई सम्बन्धित जिल्लाहरूमा रोकिएका छन् ।
बिहीबारका लागि पनि यातायात सञ्चालन हुने नहुनेमा निश्चित नरहेको सदरमुकाम फुङ्लिङस्थित पाथीभरा यातायात प्रालिका काउन्टर इन्चार्ज शरण लिम्बूले जानकारी दिए । उनले मेची राजमार्ग बाहेकका स्थानीय तथा अन्य सडकमा भने सवारी साधन सञ्चालनमा रहेको बताए । संयुक्त सङ्घर्ष समितिले मङ्गलबार नै विज्ञप्ति प्रकाशित गरी बुधवार र बिहीबार दुई दिन मेची राजमार्गमा यातायात बन्द आह्वान गरेको छ ।
