भनिन्छ, तपाईंको मुस्कानले अगाडिको दिन बनाउन सक्छ। हो, तर यो मुस्कान अगाडिको लागि मात्र होइन, तर आफ्नो लागि पनि लाभदायक हुन सक्छ।
जस्तोसुकै परिस्थितिमा पनि जो मुस्कुराउन सक्छ, उसैको जीवन सफल हुन्छ। हाँस्नु स्वास्थ्यका दृष्टिले समेत एकदमै फाइदाजनक मानिन्छ। हाँसो सर्वसुलभ प्राकृतिक औषधि नै हो। खुलेर हाँस्नुलाई एक महत्वपूर्ण उपचार मानिन्छ । यसबाट धेरै मानसिक समस्याको समाधान गर्न सकिने चिकित्सकले बताएका छन् । मानिस हाँस्दा मानिसको सबै मांशपेशी सक्रिय हुनेछन् । रक्त सञ्चार पनि राम्रो हुने गर्छ । यसले मानिसको शरीरमा पर्याप्त मात्रामा अक्सिजन पुग्ने गर्छ । त्यसैले हाँस्नु स्वास्थ्यको लागि राम्रो हुनसक्ने बताइएको हो ।
यहाँ हाँस्नुका केही फाइदा उल्लेख गरिएको छ –
हृदयाघात हुने सम्भावना कम
हाँस्नुले मुटुको पनि अभ्यास हुन्छ । रक्त सञ्चार पनि राम्रो हुनेछ । हाँस्दा शरीरमा एन्डोर्फिन नामको रसायन निस्किन्छ । यसले मानिसको मुटुलाई बलियो बनाउन सहयोग गर्छ । केही अनुसन्धानले हाँस्दा मानिसमा हृदयाघातको सम्भावना पनि कम हुने देखाएका छन् ।
तनाव कम
हामी हाँस्दा हाम्रो शरीरमा एक किसिमको हर्मोन उत्पन्न हुन्छ। सो हर्मोनको काम तनाव कम गर्ने हो। वा दिल खोलेर हाँसेर तनाव व्यवस्थापन गर्न सकिन्छ। तनावकै कारण हुने विभिन्न शारीरिक तथा मानसिक समस्याबाट जोगिनसमेत हाँस्न जरुरी छ। कठिन परिस्थितिमा पनि हाँस्न सक्नु नै स्वस्थ रहने सरल उपाय हो।
स्वस्थ जीवन
हाँस्दा शरीरका अंगहरू सक्रिय हुने गर्छन्। जसकारण हाम्रो शरीरमा ऊर्जा उत्पन्न हुन्छ। खुलेर हाँस्दा शरीरमा पर्याप्त अक्सिजन पुग्छ र मुटुको पम्प रेटलाई ठीक राख्न मद्दत हुन्छ। साथै अनिद्राको समस्या हटाउन पनि हाँस्न जरुरी छ।
व्यवसायमा सफल
व्यवसाय गर्ने मानिस प्रायः सधैँ हँसिलो देखिन्छ। अरूको मन जित्नका लागि पनि मुस्कुराउन जरुरी छ। मुस्कुराउने वा नरम हुनाले एक–अर्कासँगको सम्बन्ध सुमधुर बनाइदिन्छ। जो व्यवसायीका लागि सकारात्मक पक्ष हो। हँसिला मानिस मात्र व्यवसायमा सफल छन भन्ने प्रमाणित भइसकेको तथ्य हो।
सकारात्मक ऊर्जा पैदा
जब हामी हाँस्छौँ, फोक्सोमा ताजा हावा पुग्छ। यसले शरीरमा अक्सिजनको आपूर्ति सहज बनाइदिन्छ। अनि, शरीरमा सकारात्मक ऊर्जा प्रदान हुन्छ। खुलेर हाँस्दा पीडा, चिन्ता दूर गराउँछ र नकारात्मक भावना पैदा हुन दिँदैन। बिहानको ताजा हावामा उन्मुक्त तरिकाले हाँस्नुपर्छ। अनि, बिहानैदेखि खुसी छाउँछ।
सधैं युवा देखिनु
सधैं हँसिलो देखिनु हाम्रो स्वास्थ्यको हिसाबमा निकै राम्रो मानिन्छ । हाँस्दा मानिसको अनुहारको १५ किसिमको मांशपेशीले एक साथ काम गर्छन् र राम्रोसँग रक्तसञ्चार पनि हुन्छ । यसकारण अनुहारमा सधैं चम्किलोपना र निखार आउँछ ।
