राष्ट्रिय सभा निर्वाचन र टीआरसीबारे छलफल गर्न सत्ता गठबन्धनको बैठक बस्दै

काठमाडौं । सत्ता गठबन्धनको बैठक आज प्रधानमन्त्री निवास बालुवाटारमा बस्दैछ । बिहान ११ बजे बस्ने बैठकमा राष्ट्रिय सभा निर्वाचन, टीआरसी विधेयकलगायतका विषयमा छलफल हुने जनाइएको छ ।

समसामयिक राजनीतिक विषयमा छलफल गर्न सत्ता गठबन्धनको बैठक बस्न लागेको प्रधानमन्त्रीको सचिवालयले जानकारी दिएको छ । सत्ता गठबन्धनले माघ ११ गते हुने राष्ट्रिय सभा निर्वाचनमा आफ्ना उम्मेदवारलाई जिताउने विषयमा छलफल गर्ने भएको हो ।

सत्तारुढ चार दलले राष्ट्रिय सभाको रिक्त हुने १९ सिट बाँडफाँट गरिसकेका छन् । ठूलो दलको हैसियतमा नेपाली कांग्रेसले १० सिट पाएको छ भने माओवादी केन्द्रले ६ सिट लिएको छ । एकीकृत समाजवादीले भागबन्डामा असन्तुष्ट रहँदै २ सिटमा चित्त बुझाएको छ । जनता समाजवादीले १ सिट पाएको छ । राष्ट्रपतिमा मनोनीत हुने एक सदस्य पद भने जनमोर्चाको भागमा परेको छ ।

प्रधानमन्त्री पुष्पकमल दाहाल संक्रमणकालीन न्यायलाई टुंगोमा पु¥याउन सक्रिय भएपनि दलीय खिचातानीका कारण अहिलेसम्म यसले गति लिन सकिरहेको छैन ।

दलीय स्वार्थका कारण गिजोलिँदै आएको संक्रमणकालीन न्यायलाई टुंगोमा पुर्‍याउन दलहरु पछिल्लो समय एकमत देखिएका छन् । यस विधेयकलाई सहमतिबाट नभए बहुमतीय प्रक्रियाबाट टुंगो लगाउनु पर्नेमा दलहरुबीच साझा मत देखिएको छ । यद्यपि दलहरुबीच भागबन्डा नमिल्दा र शीर्ष नेता जिम्मेवार नबन्दा संक्रमणकालीन न्याय हरेक समय दाउपेचमा पर्दै आएको छ ।

• संसद विघटन