काठमाडौं । बाँसबारी छाला जुत्ता कारखानाको जग्गा हिनामिना प्रकरणमा थप व्यक्तिमाथि पनि अनुसन्धान भइरहेको प्रहरीले जनाएको छ ।
नेपाल प्रहरीको केन्द्रीय अनुसन्धान ब्यूरो सीआईबीले आज पत्रकार सम्मेलन गरी बाँसबारी छालाजुत्ता उद्योगको १० रोपनी जग्गा हिनामिना प्रकरणमा अन्य व्यक्ति पनि तानिन सक्ने जनाएको हो ।
सीआईबीले हिजो सीजी ग्रुप अन्तर्गत सीजी होल्डिङ्सका अध्यक्ष तथा प्रबन्ध निर्देशक अरुण चौधरी, बाँसबारी छालाजुत्ता उद्योगका तत्कालीन अध्यक्ष अजितनारायणसिंह थापा र चाँदबाग रेसिडेन्सीका सञ्चालक सञ्जय ठाकुरलाई पक्राउ गरेको थियो ।
तीन जनालाई पक्राउ गरिएको र थप व्यक्तिमाथि पनि अनुसन्धान भइरहेको सीआईबीको भनाइ छ । जग्गा दिने र लिने दुवै तर्फका व्यक्तिहरुलाई अनुसन्धानमा तानिएको सीआईबीले जनाएको छ । जग्गाको स्वामित्व हस्तान्तरण प्रक्रिया, विधि र निर्णय अपारदर्शी रहेको सीआईबीको दाबी छ ।