निजामती ऐन र प्रहरी ऐन कार्यान्वयनको प्रक्रियामा छ : प्रधानमन्त्री

काठमाडौं । प्रधानमन्त्री पुष्पकमल दाहाल ‘प्रचण्ड’ले संघीय निजामती ऐन र प्रहरी समायोजन ऐन कार्यान्वयनमा जाने ढोका खुलेको बताएका छन् । संवेदनशील र अत्यन्त महत्त्वपूर्ण ऐनहरू कार्यान्वयनका लागि आफूले प्रक्रिया अघि बढाएको प्रधानमन्त्री प्रचण्डको भनाइ छ ।

शुक्रबार राष्ट्रियसभा बैठकमा उनले प्रहरी समायोजना ऐन कार्यान्वयनको प्रक्रियामा लगिएको र संघीय निजामती सेवा ऐन विस्तृत बहसपछि प्रतिनिधिसभामा पेस गरिएकाले संघीय संसद्को दुवै सदनबाट छिट्टै पारित हुने विश्वास व्यक्त गरे ।

“संघीयताको मूल मर्म नै तीन तहको अधिकार र स्रोतको समन्यायिक वितरण नै हो । त्यसैले तहगत अन्तरसम्बन्ध र समन्वयसँग जोडिएका समस्याहरू सम्बोधन नगरी सही अभ्यास पनि हामी अगाडि बढाउन सक्दैनौँ । सरकारले यो विषयलाई गम्भीतारपूर्वक लिँदै अन्तरप्रदेश समन्वय तथा कार्य विस्तृतीकरणका विषय टुंग्याउने र राष्ट्रियसभाको संघीयता कार्यान्वयन र अध्ययन तथा अनुगमन संसदीय विशेष समितिका निर्देशनहरू कार्यान्वयनमा रहेको जानकारी गराउन चाहन्छु,” उनले भने ।

प्रधानमन्त्री प्रचण्डले सरकारले संघीयता कार्यान्वयनसँग सम्बन्धित कानुन निर्माणको कामलाई उच्च प्राथमिकताका साथ अघि बढाएको पनि बताए ।

• संसद विघटन