काठमाडौं । चैत ३० देखि ओमानमा हुने एसिसी प्रिमियर कप ट्वान्टी-२० क्रिकेट प्रतियोगिताका लागि नेपाली राष्ट्रिय क्रिकेट टोलीको घोषणा भएको छ।
एसियाली क्रिकेट काउन्सिल (एसिसी) ले सार्वजनिक गरेको १४ सदस्यीय टोलीमा एसएमएस फ्रेन्डसिप कप खेलेका खेलाडी छन् । उक्त प्रतियोगिता खेलेका आकाश चन्द भने टोलीमा अटाएका छैनन् ।
प्रतियोगिताको नेपाल समूह ‘ए’ हङकङ, मलेसिया, कतार र साउदी अरेबिया तथा समूह ‘बी’ मा ओमानसहित युएई, कुवेत, बहराइन र कम्बोडिया छन्। नेपालले चैत ३० गते मलेसियासँग खेल्दै प्रतियोगिताको सुरुआत गर्नेछ । यसैगरी नेपालले कतारसँग बैशाख १ , हङकङसँग वैशाख ३ र अरेबियासँग वैशाख ५ मा प्रतिस्पर्धा गर्नेछ । समूहमा शीर्ष दुई टिम सेमिफाइनल पुग्नेछन्। प्रतियोगिताको विजेता सन् २०२५ मा हुने एसिया कपमा छानिने छ । यसैगरी शीर्ष तीन टोलीले एसिसी इमर्जिङ टिम्स एसिया कप खेल्नेछन्।
