जम्मू कश्मिरमा आक्रमण गर्ने आतंककारीको तस्बिर सार्वजनिक
साझा परिवेश
बुधबार, बैशाख ११, २०८२ २१:४0
जम्मू कश्मिरको पहलगाममा भएको आक्रमणमा संलग्न तीन जना आतंककारीको स्केच सार्वजनिक भएको छ। भारतीय सुरक्षा एजेन्सीहरूले मुसा, युनुस र आसिफ नामका आक्रमणकारीहरूको स्केच सार्वजनिक गरेको हो।
मंगलबार पहलगाममा भएको आक्रमण उनीहरूको प्रत्यक्ष संलग्नता रहेको सुरक्षा एजेन्सीहरूले पुष्टि गर्दै स्केच सार्वजनिक गरेको हो। उनीहरू तीनैजना लश्कर-ए-तोयबासँग सम्बन्धित रहेको बताइएको छ। उनीहरूलाई आसिफ शेख, सुलेमान साह र अबु तल्लाहका नामले चिनिने गरेको सुरक्षा एजेन्सीलाई उद्धृत गर्दै टाइम्स अफ इन्डियाले उल्लेख गरेको छ।
उनीहरू एक-४७ लगायतका अत्याधुनिक बन्दुकहरू लिएर पहलगाममा पर्यटकमाथि अन्धाधुन्ध फायर गरेका थिए। घटनामा २८ जनाको मृत्यु भएको छ। जसमा एक नेपाली पनि रहेका छन्। बुटवल निवासी सुदीप न्यौपानेको घटनामा मृत्यु भएको छ।
