नेपाली कांग्रेस प्रदेश १ मा संसदीय दलको नेता छान्न आज निर्वाचन, तीन जनाबीच प्रतिस्पर्धा

विराटनगर। नेपाली कांग्रेस प्रदेश १ संसदीय दलको नेता छान्न आज निर्वाचन हुँदैछ। अन्तिम समयसम्म पनि सहमति जुट्न नसक्दा शुक्रबार बिहान ९ बजे मतदान हुने भएको हो। संसदीय दलको नेतामा तीन जनाको उम्मेदवारी दर्ता भएको छ।

जसमा प्रदेश १ का आन्तरिक तथा कानुन मन्त्री समेत रहेका केदार कार्की, नेपाली कांग्रेस प्रदेश १ सभापति उद्धव थापा र पार्टीका केन्द्रीय सदस्य अमृत अर्यालले उम्मेदवारी दिएका छन्।

दलको नेतामा आकांक्षी देखिएका भीमप्रसाद पराजुलीले थापालाई समर्थन गरेका हुन्। थापा र पराजुली कृष्णप्रसाद सिटौला पक्षका नेता हुन्। थापाको प्रस्तावका पराजुली र समर्थकमा भूपेन्द्र राई रहेका छन्।

संस्थापन पक्षका अर्याललाई डोल्मा तामाङले प्रस्ताव गरेकी छिन् भने समर्थकमा सुनिता कुमारी गुरुङ रहेकी छन्। प्रदेश १ आन्तरिक मामिला तथा कानुन मन्त्रीसमेत रहेका कार्की डाक्टर शेखर कोइराला समूहका हुन्। उनको प्रस्तावक रामकुमार खत्री र समर्थक शमशेर राई छन्।

सहमतिको अन्तिम प्रयास भए पनि अहिलेसम्म सहमति हुन नसकेको एक नेताले जानकारी दिए। उनले सहमति जुट्न नसके शुक्रबार बिहान ९ बजे मतदान हुने जानकारी दिए। कांग्रेस प्रदेश १ मा २९ जना सदस्यले मतदान गर्न पाउने छन्।