बजेट अन्यत्र खर्च गर्ने भएपछि स्थानीयबासी आक्रोशित

सोलुखुम्बु । सोलुखुम्बुको नेचासल्यान २ मा बन्दै गरेको सामुदायिक भवनका लागि प्रदेश सरकारद्धारा बिनियोजन भएको बजेट अन्यत्र खर्च गर्ने भएपछि स्थानीयबासी आक्रोशित भएको छ ।

नेचासल्यान २ को केउरेनीमा निर्माणाधीन सामुदायिक भवनका लागि यस आर्थिक वर्षमा प्रदेश सरकारबाट बिनियोजन भएको ३० लाख बजेट वडाध्यक्ष सीताराम काफ्लेको अग्रसरतामा अन्यत्र लान खोजेपछि स्थानीयबासी आक्रोशित बनेको हो ।

आफ्नो ठाउँका लागि आएको बजेट अन्यत्र जाने भएपछि आँफूहरू आक्रोशित हुनुपरेको स्थानीय शिक्षक राजु निरौलाले बताउनुभयो ।

उनका अनुसार केउरेनीमा बन्दै गरेको सामुदायिक भवनका लागि छुट्टिएको रकम निर्माणाधीन भवनलाई अलपत्र पारेर वडाध्यक्ष काफ्लेले भवन बनाउन अर्कै ठाउँमा सिफारिस गरेका कारण समस्या भएको हो ।

प्रदेश सरकारबाट बिनियोजित रकम नेपाली कांग्रेसका केन्द्रिय सदस्य तथा पूर्व मन्त्री बलबहादुर केसीको घर नजिकै सार्वजनिक जग्गा नै नभएको ठाउँमा अर्को सामुदायिक भवन बनाउन २ नम्बर वडा कार्यालयले सम्झौताको लागि शहरी विकास तथा भवन कार्यालय ओखलढुंगालाई सिफारिस गरेपछि रुष्ट बनेको स्थानीयबासी निरौला बताउँउनुहुन्छ ।

वडाध्यक्षको उक्त कदमको हाल केउरेनीमा बसोबास गर्ने मात्र नभइ काठमाण्डौँसहित पूर्वी तराईमा बसोवास गर्दै आएका पुराना केउरेनीबासीहरू समेत आक्रोशित भएको रमेश निरौलाले बताउनुभयो ।

योजना सारिएको विषयमा गाउँपालिका अध्यक्ष राई भने आँँफूले गल्ती गरेको नभइ वडाध्यक्षको गल्तीका कारण योजना अन्यत्र सरेको बताउनुभयो ।

राईले भने, ‘स्थानीय स्तरमा वडाले गर्ने सिफारिसका कारण मेरो त्यो योजनामा केही हात छैन ।’

यता वडाध्यक्ष काफ्लेले भने योजना स्थानान्तरण हुनुमा आफ्नो हात नरहेको बताउनुभयो । काफ्लेले भने, ‘यस वडामा ठुल्ठुला नेताहरू हुनुहुन्छ । म त अह्राएको काम गर्नेजस्तै भएको छु ।’ नेचा सल्यान २ भने नेपाली कांग्रेसका केन्द्रिय सदस्य तथा पूर्व मन्त्री बलबहादुर केसीको वडा हो ।

योजना स्थानान्तरणका कारण नेचासल्यान २ नम्बरका वडाबासी दुई समूहमा विभाजित भएको छ ।

योजना स्थानान्तरणको विषयमा भने शहरी विकास तथा भवन कार्यालय ओखलढुंगाका निमित्त प्रमुख अनुज श्रेष्ठले योजनाको आफ्नै जग्गा नभएका ठाउँमा भवन निर्माणका लागि योजना ल्याएकाले सम्झौता हुन नसकेको बताउनसुभयो ।

योजना संचालनका लागि वडा र गाउँपालिकाको सिफारिसमा संचालन गर्ने भएपनि योजनाको भवन व्यक्तिको जग्गामा बन्ने नभइ योजनाकै जग्गा आवश्यक पर्ने भएकोले सम्झौता हुन नसकेको उनले बताउनुभयो ।

• संसद विघटन