जसपाले सार्यो उपेन्द्र यादव उम्मेदवार बनेपछि विधान अधिवेशन
साझा परिवेश
बिहिबार, चैत्र २३, २०७९ १३:३७
काठमाडौं
जनता समाजवादी पार्टी नेपालले विधान अधिवेशन सारेको छ। चैत २७ गतेबाट गर्ने भनिएको जसपाको विधान अधिवेशन जेठ १ गतेलाई सारिएको प्रचार विभाग प्रमुख पूर्ण बस्नेतले जानकारी दिए।
उनका अनुसार जेठ १ देखि ३ गतेसम्म काठमाडौंमा विधान महाधिवेशन हुनेछ।
बैशाख १० गते हुन गइरहेको उपनिर्वाचनमा अध्यक्ष उपेन्द्र यादव बारामा उम्मेदवार बनेका कारण बैठक सारिएको जसपाले जनाएको छ। विधान अधिवेशन गर्नका लागि आवश्यक तयारी पूरा हुन बाँकी रहेको भन्दै निर्धारित कार्यक्रम सरेको छ।
जसपाका विधान मस्यौदामाथि जिल्ला, प्रदेशबाट सुझाव संकलनसमेत भएको थियो। केन्द्रीय कार्यकारिणी समिति सदस्य प्रकाश अधिकारी संयोजकत्वको मूल व्यवस्थापन समितिको बैठकले विधान अधिवेशन तयारीका लागि आर्थिक उपसमिति, प्रचार प्रसार उपसमिति, भोजन आवास तथा हल व्यवस्थापन (लजिस्टिक) उपसमिति, स्वयंसेवक परिचालन उपसमिति गठन गरेको थियो।
