राष्ट्रपतिलाई के भएको हो, आधिकारिक जानकारी चाहियो : राई
साझा परिवेश
बुधबार, बैशाख १३, २०८० १४:२४
काठमाडौं । राष्ट्रियसभा सदस्य डा विमला पौडेल राईले राष्ट्रपति रामचन्द्र पौडेलको स्वास्थ्य अवस्थाबारे सदनमा जानकारी गराउन सरकारसँग माग गरेकी छिन्।
बुधबारको बैठकमा बोल्दै उनले राष्ट्रपति देशको अभिभावक भएकाले स्वास्थ्य अवस्थाबारे नागरिकले थाहा पाउनुपर्ने बताइन्।
‘हाम्रो राष्ट्रपति १० दिनदेखि भारतमा उपचार गराइरहनुभएको सुनेका छौं । के भएको हो उहाँलाई? नेपालमा त्यसको उपचार हुन्थ्यो कि हुँदैन थियो? स्वास्थ्यमा सुधार कस्तो छ? यो विषयमा सरकारले जनताका लागि सदनमा जानकारी गराउनुपर्थ्यो। किनभने राष्ट्रपति यो देशको अभिभावक हो ।’ उनले भनिन्, ‘अभिभावक विरामी भएर छिमेकी देशमा उपचार गराइरहनुभएको छ । अर्कोतर्फ वीर अस्पतालमा भीभीआईपी उपचार कक्षमा धुलो लागेको छ । हाम्रा भीभीआइपी धेरैजसो बाहिर उपचार गराउनुहुन्छ । नेपालमा कुन कुन रोगको उपचार हुँदैन । र त्यसलाई सुधार गर्न के गर्नुपर्छ भन्ने कुरा पनि जानकारी गराउन म सरकारको ध्यानाकर्षण गराउँछु।’
