काठमाडौं । बेलायतकी इमा राडुकानुले फ्रेन्च ओपन र विम्बल्डन गुमाउने भएकी छन् । नाडी र कुर्कुच्चाको शल्यक्रिया गरेका कारण पूर्वयूएस ओपन च्याम्पियन राडुकानुले फ्रेन्च ओपन र विम्बल्डन गुमाउने भएकी हुन् ।
राडुकानुले बुधबार साँझ समाजिक सञ्जालमा फाटो राखेर भनेकी छन्, “विगत १० महिनादेखि मेरा दुवै हातका हड्डीमा चोट दोहोरिरहेको थियो । अहिले सुरक्षित भएको छ । दुवै हातको समस्या समाधानका लागि सानो शल्यक्रिया गरिएको छ । अब आउँदो केही महिनाका लागि कोर्टबाहिर हुनेछु भन्नुपर्दा म निराश छु । यो अवस्थामा हुँदा मेरो खुट्टामा अर्को सानो शल्यक्रिया हुनेछ ।’’
सन् २०२१ मा १८ वर्षको उमेरमा यूएस ओपनको उपाधि जितेपछि राडुकानुले फिट रहन र लय भेट्टाउनका लागि संघर्ष गरिरहनुपरेको थियो । दाहिने हातमा चोट लागेका कारण राडुकानुले गएको महिना मड्रिड ओपनबाट नाम फिर्ता लिएकी थिइन् ।
मड्रिड ओपनबाट नाम फिर्ता लिएपछि राडुकानु सम्भवतः वरीयतामा शीर्ष १०० भन्दा बाहिर रहनेछिन् । राडुकानु मियामी ओपनको पहिलो चरणबाटै बाहिरिएकी थिइन् ।
अष्ट्रेलियन ओपनमा पन राडुकानु दोस्रो चरणमै कोको गउफसँग सोझो सेटमा पराजित भएर बाहिरिएकी थिइन् ।
‘‘यस ग्रीष्मकालमा हुने प्रतियोगिता गुमाउनुपर्दा मलाई पीडा भएको छ । मेरा समस्याहरूलाई समाधान गरेर फेरि कोर्टमा फर्किनेछु । निरन्तर साथ र सहयोगका लागि सम्पूर्ण समर्थकहरूलाई धन्यवाद,’’ राडुकानुले भनेकी छन् ।
