अख्तियारले एक वर्षमै १८ हजार २४५ उजुरीलाई लगायो वारपार
साझा परिवेश
मङ्लबार, साउन २, २०८० १३:४९
आयोगले एक वर्षमा १८ हजार २४५ वटा उजुरीको काम सकायो
अख्तियारले गत आर्थिक वर्ष २०७९-८० मा उक्त उजुरीहरु फछ्र्यौट गर्यो
काठमाडौं ।।
अख्तियार दुरुपयोग अनुसन्धान आयोगले एक वर्षमा १८ हजार २४५ वटा उजुरी फछ्र्यौट गरेको छ । अख्तियारले गत आर्थिक वर्ष २०७९-८० मा उक्त उजुरीहरु फछ्र्यौट गरेको हो ।
अख्तियारका अनुसार आर्थिक वर्ष २०७८-७९ बाट जिम्मेवारी सरेर आएका सात हजार १६२ समेत गरी कुल २७ हजार ५३० उजुरीहरु परेका थिए । परेका कुल उजुरीमध्ये ६६.२७ प्रतिशत फछ्र्यौट गरिएको अख्तियारले जनाएको छ ।
अघिल्लो आर्थिक वर्ष २०७८-७९ मा अख्तियारमा कुल २४ हजार ३३१ वटा उजुरी परेका थिए । ती उजुरीमध्ये १७ हजार १६९ उजुरी फछ्र्यौट गरिएको थियो ।
अघिल्लो आर्थिक वर्ष परेकामध्ये ७०.५६ प्रतिशत उजुरी फछ्र्यौट भएका थिए । गत आर्थिक वर्ष एक हजार ७३ वटा उजुरीलाई विस्तृत अनुसन्धानको लागि पठाइएको अख्तियारले जनाएको छ । अघिल्लो आर्थिक वर्ष यस्तो उजुरीको संख्या ८२३ रहेको थियो ।
