मन्त्रीहरुको जिम्मेवारी तोकेर भूकम्प प्रभावित क्षेत्रमा खटाइयो

आन्तरिक मामिला तथा कानुनमन्त्री जिसी र सामाजिक विकास मन्त्री खड्ग पोखरेल सुर्खेतमा बसेर आवश्यक राहत व्यवस्थापनदेखि आपूर्ति लगायतका कामहरू गर्नेछन् । जिसीले प्रदेशबाट गर्ने आवश्यक सामग्रीहरू एकद्वार प्रणालीमार्फत जिल्लाहरूमा पठाउने छन् । उनी शनिबारदेखि नै सुर्खेत विमानस्थलमा रहेर आपूर्तिको काममा सक्रिय छन् । कृषिमन्त्री भीम प्रकाश शर्मा रूकुम पश्चिम र गृहजिल्ला सल्यानमा रहेर काम गर्नेछन् ।

यस्तै ऊर्जा तथा जलस्रोत मन्त्री उर्मिला विश्वकर्मा पनि खानेपानी लगायतका विषयमा रहेर प्रभावित क्षेत्रमै खटिने छिन् । भूकम्पले क्षति पुगेका खानेपानीका योजना मर्मतदेखि मन्त्रालयबाट गर्नुपर्ने काम उनले गर्नेछिन् । उनी पनि सोमबार बिहान जाजरकोट पुग्दैछिन् । भौतिक पूर्वाधार तथा सहरी विकास मन्त्री मंगलबहादुर शाहीलाई भौतिक संरचनाको तथ्यांक संकलनदेखि अभिलेख राख्ने लगायतका कार्यमा सक्रिय हुने गरी जिम्मेवारी तोकिएको छ । प्रभावित क्षेत्रका लागि प्रदेश सरकारले छुट्याएको रकम अबको केही दिनभित्र पालिका पठाइने कर्णाली प्रदेश सरकारका प्रवक्ता एवम् कानुनमन्त्री कष्णबहादुर जिसीले बताए । उनका अनुसार पालिकाहरूले सहज रूपमा राहत सामग्री खरिद गर्न सक्ने व्यवस्था मिलाइने छ ।