दिनमणि पोखरेल र डिएन पराजुली मध्ये १ जना न्यायाधीश नियुक्त गर्ने
रेशम चौधरी रिहाइमा पोखरेलले कानुन विपरित काम गरेको आरोप
काठमाडौं।।
सर्वोच्च अदालतमा रिक्त सबै न्यायाधीश नियुक्तीका लागि दलीय भागबण्डा गरिएको छ। प्रमुख तीन राजनीतिक दल नेपाली कांग्रेस, नेकपा एमाले र माओवादी केन्द्रले भागबण्डा गरेर न्यायाधीश नियुक्ती गर्ने तयारी गरेका हुन्। स्रोतका अनुसार नेपाली कांग्रेसबाट डा. विजय मिश्र, नेकपा एमालेबाट रमेश बडाल र माओवादी केन्द्रबाट महान्यायाधीवक्ता दिनमणि पोखरेल र डिएन पराजुली मध्ये एक जना न्यायाधीश नियुक्त गर्ने सहमति भएको हो। कांग्रेस कोटमा परेका डा. मिश्र नेपाल बारका पूर्व महासचिव हुन्। यसैगरी एमाले कोटामा परेका बडाल पूर्व महान्यायाधीवक्ता हुन्।
स्रोतका अनुसार माओवादी अध्यक्षसमेत रहेका प्रधानमन्त्री पुष्पकमल दाहाल प्रचण्डले महान्यायाधीवक्ता दिनमणि पोखरेललाई न्यायाधीश बनाउन दबाव दिएका छन्। पोखरेल रेशम चौधरी जेलमुक्ति प्रकरणमा विवादित बनेका छन्। रेशम चौधरी रिहाइमा पोखरेलले कानुन विपरित काम गरेको आरोप लागेको छ। पोरखेलको नाममा सहमति बन्न नसके माओवादी कोटाबाट डिएन पराजुलीलाई अघि सार्ने तयारी भएको छ। कांग्रेस सभापति शेरबहादुर देउवाले पनि कानुनमन्त्री धनराज गुरुङलाई बोलाएर महान्यायाधीवक्ता पोखरेलले भुटानी शरणार्थी प्रकरणमा नेता बालकृष्ण खाणलाई पक्राउ गर्न भूमिका खेलेको भन्दै उनलाई न्यायाधीश सिफारिस नगर्न भनेका छन्।
स्रोतका अनुसार सभापति देउवाले कानुनमन्त्री गुरुङलाई बोलाएरै महान्यायाधीवक्ता पोखरेल सर्वोच्चको न्यायाधीश बन्न लागेको आफूले सुनेको भन्दै उनको नाम सिफारिस नगर्न भनेका हुन्। देउवाले नेता खाणलाई पक्राउ गर्न गृहमन्त्री नारायणकाजी श्रेष्ठ, एआईजी श्याम ज्ञवाली र महान्यायाधीवक्ता पोखरेलले भूमिका खेलेको भन्दै पोखरेलको नाम सिफारिस नगर्न भनेका हुन्। पराजुली यसअघि पनि अघिल्लो वर्षको भदाैमा सिफासिमा परेका थिए। तर, तत्कालीन प्रतिनिधिसभाको कार्यकाल सकिएको र त्यसपछि निर्वाचित प्रतिनिधिसभामा संसदीय सुनुवाइ समिति गठन नभएका कारण संसदीय सुनुवाइ हुन नसकपछि उनी नियुक्त हुन सकेका थिएनन्।
त्यसबाहेक अन्य चार जना उच्च अदालतका न्यायाधीशलाई सर्वोच्चाम नियुक्तीको लागि सिफारिस गर्ने तयारी गरिएको छ। आइतबारदेखि न्यायाधीश नियुक्तीका विषयमा न्यायपरिषद सदस्यहरुबीच सघन छलफल भएको थियो। सम्भवत आज साँझसम्म न्यायाधीश नियुक्तीको सिफारिस हुन सक्ने बताइएको छ। सर्वोच्च अदालतमा प्रधान्यायाधीशसहित २१ जना न्यायाधीशको दरबन्दी छ। अहिले सर्वोच्चमा प्रधानन्यायाधीशसहित १४ जनामात्र न्यायाधीश छन्। ७ जनाको दरबन्दी रिक्त छ। सर्वोच्चमा न्यायाधीश नियुक्तीको लागि उच्च अदालत दिपायलका मुख्य न्यायाधीश नृपध्वज निरौला, उच्च अदालत विराटनगरका कामु मुख्य न्यायाधीश सत्यमोहन जोशी थारु, उच्च अदालत जनकपुरकी कामु मुख्य न्यायाधीश सारंगा सुवेदीको नाम सिफारिस गर्ने तयारी भएको छ। यसैगरी उच्च अदालत सुर्खेतका कामु मुख्य न्यायाधीश माधवप्रसाद पोखरेललाई सर्वोच्चको न्यायाधीश नियुक्तीको लागि सिफारिस गर्ने तयारी भएको स्रोतले जनाएको छ।
