अधिवक्ता स्वागतले नै निषेधाज्ञा निर्णयविरुद्ध दायर गरे रिट
साझा परिवेश
मङ्लबार, मंसिर ५, २०८० १६:३६
निषेधाज्ञा निर्णयविरुद्ध सर्वोच्च अदालतमा रिट
शान्तिपूर्ण रुपमा भेला हुन पाउने नागरिकको अधिकार रहेन
उत्प्रेषणको आदेशले बदर गर्न माग
काठमाडौं ।।
माइतीघर मण्डला क्षेत्रमा निषेधाज्ञा जारी गर्ने जिल्ला प्रशासन कार्यालय काठमाडौंको निर्णयविरुद्ध सर्वोच्च अदालतमा रिट परेको छ । आफूलाई चित्त नबुझेपछि सरकारका कतिपय निर्णयविरुद्ध मुद्दा हाल्दै आएका अधिवक्ता स्वागत नेपालले आज सर्वोच्चमा रिट दर्ता गराएका हुन् । रिटमा जिल्ला प्रशासन कार्यालयको निर्णयले बिना हातहतियार शान्तिपूर्ण रुपमा भेला हुन पाउने नागरिकको अधिकार कुण्ठित भएको जिकिर गर्दै उत्प्रेषणको आदेशले बदर गर्न माग गरिएको छ ।
उक्त रिटमाथि प्रारम्भिक सुनुवाइ गर्न भोलिका लागि पेसी तोकिएको छ । व्यवस्था उल्ट्याउने अभियानमा रहेका भनिएका दुर्गा प्रसाईं र नेकपा एमालेको भ्रातृ संस्था युवासंघले एकैदिन, एकै ठाउँमा आन्दोलनको तयारी गरेपछि सम्भावित झडपलाई मध्यनजर गर्दै जिल्ला सुरक्षा समिति काठमाडौंको सिफारिसका आधारमा सिडिओ कार्यालयले हिजो माइतीघर–बानेश्वरलाई निषेधित क्षेत्र घोषणा गरेको थियो ।
