ललितपुर ।।
सर्जक डा. कृष्ण जंग राणाको उर्दू भाषाको गजलकृति ‘रंग-ए-गजल’ एक समारोहकाबीच लोकार्पण गरिएको छ । बिहीबार ललितपुरमा आयोजित कार्यक्रममा प्रमुख अतिथि कथाकार मधुवन पौडेललगायतले कृति सार्वजनिक गरे । मन्तव्यका क्रममा गजलकार डा. मोविन खानले डा. राणाको गजलकारिताको चर्चा गर्दै कृतिभित्रको एउटा गजल वाचन गरे ।
मन रोया सौ बार ओ रब्बा सुझे आर ना पार
अब तो खोलो द्वार ओ रब्बा सुझे आर ना पार ।
गजलकार डा. राणाको यो सुफियाना (आध्यात्मिक) गजल वाचन गर्दै डा. खानले आध्यात्मिक चेतले भरिएको यो गजलले हरेक स्रोता र पाठकलाई गम्भीर बनाउने विचार व्यक्त गरे । डा. राणाको उर्दू लिपिमा गजल प्रकाशन गरेर डा. राणाका रचनाहरूलाई आफूहरूले सुरक्षित राख्ने काम गरेको बताए । ९३ वर्षिय गजलकार डा. राणाको २४औं कृति ‘रंग-ए-गजल’को प्रसंग उठाउँदै उर्दू अकादमी नेपालका अध्यक्ष इम्तियाज वफाले मन छुने र आत्मालाई ताजा बनाउने गजलहरू यस कृतिभित्र समेटिएको उल्लेख गरे । प्रा.डा. सनतकुमार वस्तीले डा. राणालाई रोगले सताए पनि उनमा अथाह सिर्जनशीलता रहेको बताए ।
कार्यक्रममा शायर खालिद मोहसिनले पाकिस्तानको एक विश्वविद्यालयले डा. राणाको नवीन कृति ‘रंग-ए-गजल’ कृतिमाथि अनुसन्धानका लागि अनुमति मिलेको जानकारी गराए । उक्त अवसरमा डा. राणाले एउटा गजल वाचन गरे भने उनलाई साथ दिँदै गजलकारहरू करुण थापा, रवि प्राञ्जल, शान्ति शर्मा, डा. लक्ष्मी जोशीले आ-आफ्ना गजल वाचन गरे । उर्दू अकादमी नेपालद्वारा आयोजित कार्यक्रममा विश्व प्रसिद्ध गजलकार मिर्जा गालिबको सम्झना गर्दै गायक मनमोहन थपलियाले मिर्जाको एक गजल गाएर सुनाएका थिए । डा. राणा चिकित्सा पेसाबाट अवकाश लिइसकेपछि कविता, गीत र गजल लेखनमा समर्पित छन् ।