जापानले प्युठानमा १ करोडको बेसार प्रशोधन केन्द्र निर्माण गरिदिने

• जापान सरकारको सहयोगमा प्युठानमा बेसार प्रशोधन केन्द्र निर्माण गर्ने 
• एक करोड नेपाली रुपैयाँ बराबरको सहयोगमा काम थालियो 
• जीजीपीअन्तर्गत सन् १९९१ यता २०० योजना सम्पन्न

काठमाडौं ।।

जापान सरकारको सहयोगमा प्युठानमा बेसार प्रशोधन केन्द्र निर्माण गरिएको छ । निर्माण गरिएको प्रशोधन केन्द्र प्युठान नगरपालिकालाई हस्तान्तरण गरिएको छ। मंगलबार नेपालका लागि जापानका राजदूत किकुता युताको उपस्थितिमा आयोजित कार्यक्रममा उक्त योजना हस्तान्तरण गरिएको हो । जापानको करिब एक करोड नेपाली रुपैयाँ बराबरको सहयोगमा भोल्युन्टियर नेपाल नेसन ग्रुप (भोल नेपाल)ले निर्माण गरेको हो ।

यसका लागि जापान सरकार अन्तर्गतको ग्रासरुट एन्ड ह्युमन सेक्युरेटी ग्रान्ट एसिसटेन्स प्रोजेक्ट (जीजीपी) अन्तर्गतबाट सहयोग प्राप्त भएको थियो । यो योजनाले प्युठान नगरपालिका–८ र आसपासका नागरिकलाई व्यवसायिक रूपमा बेसार उत्पादनका लागि सहजता प्रदान गर्ने विश्वास गरिएको छ ।

बेसार उत्पादनका लागि यो ठाउँ उपयुक्त रहेपनि मानिसहरूले आफैले खानका लागि परम्परागत पद्धतिबाट प्रशोधन गर्दै आएका थिए ।सन् २००५ मा स्थापित भोल नेपालले ग्रामीण विकासका लागि काम गर्दै आएको छ । कार्यक्रममा राजदूत किकुताले प्रशोधन केन्द्रले किसानहरूलाई जीवनयापन सुधार्न मद्दत गर्ने विश्वास व्यक्त गरेका छन् । जीजीपीअन्तर्गत सन् १९९१ यता २०० योजना सम्पन्न भइसकेको जापानी राजदूतावासले जनाएको छ ।