धनकुटाको बाघखोरमा हेलिप्याड निर्माण गरिएको छ । विपद्, गर्भवती, सुत्केरी तथा गम्भीर प्रकारका आकस्मिक घटनामा उद्धार गर्न सहज होस् भन्ने उद्देश्यले धनकुटा नगरपालिका–९ बेलहारास्थित बाघखोरमा हेलिप्याड निर्माण गरिएको हो ।
धनकुटा–९ को कार्यालय, डीएन ग्रुप अफ कम्पनी र स्थानीयको आर्थिक सहयोग तथा नेपाली सेनाको भीमदल गणको प्राविधिक सहयोगमा हेलिप्याड निर्माण भएको हो । नेपाली सेना नम्बर–२ बाहिनी अड्डा हिलेका बाहिनी पति सहायक रथी रामकाजी थापाले आइतबार हेलिप्याड समुद्घाटन तथा हस्तान्तरण गर्नुभयो ।
विपदका घटना आइपर्दा र गर्भवती, सुत्केरी तथा गम्भीर प्रकारका बिरामीको उद्धारका लागि सहज होस् भन्ने उद्देश्यले हेलिप्याड निर्माण गरिएको सहायक रथी थापाले बताउनुभयो ।
थापाले हेलिप्याड निर्माण सम्पन्न भएपनि सामान खरिदको ६० हजार रुपैयाँ आफूले भुक्तान गर्ने बताउनुभयो । भीमदल गणबाट १० दिनसम्म पर्खाल लगाई हेलिप्याडको ढलान सहितका कार्य गरिएको जनाएको छ ।
हेलिप्याड निर्माणबाट स्थानीय बासिन्दाहरु प्रत्यक्ष रुपमा लाभान्वित हुने विश्वास लिइएको भीमदल गणका गणपति प्रमुख सेनानी सुमन थापाले बताउनुभयो । हेलिप्याड निर्माण समिति संयोजक मनोज रायमाझी, कोशी प्रदेशसभाका पूर्व सदस्य कुशुम श्रेष्ठ, प्रमुख जिल्ला अधिकारी पुण्यविक्रम पौडेल, धनकुटा नगरपालिका–९ का अध्यक्ष टंक रोइला लगायतले धारणा राखेका थिए ।
