विराटनगर । लागूऔषध ब्राउनसुगरसहित मोरङ प्रहरीले तीनजनालाई पक्राउ गरेको छ ।
प्रहरीले मोरङको उर्लाबारीबाट ब्राउनसुगरसहित तीन जनालाई पक्राउ गरेको हो । इलाका प्रहरी कार्यालय उर्लाबारीले लागूऔषध गाँजासहित पक्राउ गरेको छ ।
उर्लाबारी नगरपालिका–६ की २० वर्षीया सोनु भुजेलले आफ्नै घरमा लागूऔषध गाँजा खरिद बिक्री गरि रहेको गोप्य सूचनाका आधारमा इप्रका उर्लाबारीबाट खटिएको प्रहरी टोलीले १ सय २६ ग्राम गाँजा फेला पारी बरामद गरेको थियो । प्रहरीले भुजेललाई पक्राउ गरी लागूऔषधसम्बन्धी कसुरमा सम्मानित जिल्ला अदालत मोरङबाट पाँच दिनको म्याद थप गरी थप अनुसन्धान भइरहेको छ ।
यस्तै प्रहरीले उर्लाबारीका ४५ वर्षीय इन्द्रप्रसाद सुवेदीले आफ्नै घरमा लागूऔषध खैरो हिरोइन र गाँजा खरिद बिक्री गरिरहेको गोप्य सूचनाको आधारमा प्रहरीले १ हजार ९० मिलिग्राम खैरो हिरोइनजस्तो देखिने खैरो पदार्थ र ३ सय १८ ग्राम गाँजा बरामद गरेको छ ।
यस्तै उर्लाबारी नगरपालिका–३ का ५७ वर्षीय नर बहादु खड्काले आफ्नै घरमा लागूऔषध गाँजा खरिद बिक्री गरिरहेको गोप्य सूचनाको आधारमा प्रहरीले १ सय ५४ ग्राम गाँजा बरामद गरेको मोरङ प्रहरीका प्रवक्ता डिएसपी रञ्जनकुमार दाहालले जानकारी दिए ।
