सिमेन्ट उद्योगका कारण बस्तीमा असर परेको भन्दै ज्ञापनपत्र
साझा परिवेश
बुधबार, चैत्र ८, २०७९ १६:१३
दाङ । दाङमा सम्राट सिमेन्ट उद्योगका कारण बस्ती विस्थापित हुने अवस्थामा पुगेको भन्दै प्रदुषण नियन्त्रणको लागि सम्बन्धित निकायको ध्यानकर्षण गराइएको छ।
लमही नगरपालिका वडा नं. ७ स्थित उद्योग छेउछाउका नागरिकले जीवनरक्षाको माग राख्दै स्थानीय सरकारसहित सरोकारवाला निकायको ध्यानाकर्षण गराएका हुन्।
‘उद्योगबाट निस्किएको धुलो, धुवाँ र आवाजका कारण हामीलाई समस्या पर्यो,’ स्थानीय कुमोद देवकोटाले भने, ‘उद्योगसँग भएको पटक–पटकको सम्झौता कार्यान्वयन भएको छैन।’
उद्योगसँग विगतमा भएको सम्झौता कार्यान्वयनको माग राख्दै सम्राट सिमेन्ट प्राली, लमही नगरपालिका, जिल्ला प्रशासन कार्यालय, जिल्ला प्रहरी कार्यालयसहित स्थानीय वडा कार्यालयलगायतका निकायमा ज्ञापनपत्र बुझाइएको छ।
उद्योगबाट निस्कने आवाजका कारणसमेत समस्या परेको भनाइ स्थानीयको छ। संघर्ष समितिसमेत बनाइएको छ। भगवानदिन यादवको संयोजक रहेको संघर्ष समितिको नामबाट ज्ञापनपत्र बुझाइएको हो।
