प्रतिवेदनमा के छ ?
डब्ल्यूएचओले आफ्ना सदस्य राष्ट्रहरूमा भएका निःसन्तानपनसम्बन्धी विभिन्न अध्ययनलाई आधार मानेर यो प्रतिवेदन सार्वजनिक गरेको हो । मध्यपूर्वी, युरोपेली, अमेरिकी, अफ्रिकी र पश्चिम क्षेत्रीय मुलुकहरूमा भएका १३३ अध्ययन प्रतिवेदनलाई विश्लेषण गरिएको छ । उक्त तथ्यांकका आधारमा व्यक्तिमा भएको दीर्घकालीन समस्या र व्यक्तिले आफ्नो जीवनको कुनै कालखण्डमा भोगेको निःसन्तानपन गरी दुई वर्ग छुट्ट्याइएको छ ।
प्रतिवेदनानुसार करिब १७.५ प्रतिशत जनसंख्यामा निःसन्तानपनसम्बन्धी कुनै न कुनै समस्या देखिएको थियो । उनीहरूलाई विशेष प्रजनन उपचार सेवा आवश्यक पर्ने उल्लेख छ । यो दर विश्वको जनसंख्यासँग तुलना गर्दा प्रति ६ मध्ये एकजना हुन आउँछ । दीर्घकालीन निःसन्तानपनको समस्या उच्च आय भएका मुलुकमा १७.८ र न्यून र मध्यम आय भएका मुलुकहरूमा १६.५ प्रतिशत रहेको प्रतिवेदनमा जनाइएको छ ।
विश्वको १७.५ प्रतिशत जनसंख्याले दीर्घकालीन रूपमा निःसन्तानपन भोगेको र १२.६ प्रतिशतले प्रजनन उमेरको कुनै कालखण्डमा केही समयका लागि आवधिक निःसन्तानपन भोगेको प्रतिवेदनमा उल्लेख छ । प्रतिवेदनानुसार दीर्घकालीन निःसन्तानपनको समस्या सबैभन्दा धेरै पश्चिमा देशहरूमा २३.२ र सबैभन्दा कम मध्यपूर्वी मुलुकहरूमा १०.७ प्रतिशत देखिएको छ ।
यस्तै, आवधिक निःसन्तानपन सबैभन्दा बढी अफ्रिकी क्षेत्रमा १६.४ र सबैभन्दा कम मध्यपूर्वी मुलुकहरूमा १० प्रतिशत रहेको प्रतिवेदनले देखाएको छ । युरोपेली मुलुकहरूमा दीर्घकालीन निःसन्तानपनको दर १६.५ तथा आवधिकको १२.४ प्रतिशत छ । अमेरिकी मुलुकहरूमा दीर्घकालीन २० र आवधिक निःसन्तानपनको समस्या १०.४ प्रतिशत छ ।
