सिंहदरबारले महानगरलाई धम्कीको भाषा प्रयोग गर्नु आपत्तिजनक : शेखर कोइराला

काठमाडौं ।  नेपाली कांग्रेसका नेता डा. शेखर कोइरालाले केन्द्र सरकार र काठमाडौं महानगरपालिका दुवै सच्चिनुपर्ने बताएका छन्। बिहीबार कोइरालाले महानगरले उठाएका प्रश्नको बेवास्ता गर्दै धम्कीको भाषा प्रयोग गर्नु सिंहदरबारले स्थानीय निकायलाई हेर्ने दृष्टिकोणको प्रतिविम्ब भएको टिप्पणी गरेका हुन्।

काठमाडौं महानगरपालिकाका प्रमुख बालेन्द्र साहले केही दिनअघि केन्द्र सरकारले समन्वय नगरेको भन्दै सिंहदरबारको फोहोर नउठाउने घोषणा गरेका थिए।

सिंहदरबारको फोहोर नउठाउने घोषणा गरेपछि मन्त्रिपरिषद् बैठकमा उनको बारे आलोचना भएको थियो। बैठकपश्चात सरकारका प्रवक्तासमेत रहेकी सञ्चार तथा सूचना प्रविधि मन्त्री रेखा शर्माले साह अराजकतातिर गइरहेको बताएकी थिइन्। उनले फोहोर व्यवस्थापन स्थानीय सरकारले नै गर्ने नीति रहेको र सो नीतिबाट साह भाग्न नमिल्ने बताएकी थिइन्।

सोही विषयलाई लिएर केन्द्र सरकारको आलोचना गरेका कोइरालाले पनि कामपाले सिंहदरबार लगायतका स्थानको फोहोर नउठाउनु अराजकता भएको बताएका छन्। उनले जिम्मेवार निकायको यस्तो व्यवहारको सबैले विरोध गर्नैपर्ने धारणा राखेका छन्।

कोइरालाले भनेका छन्, ‘कामपाले सिंहदरबार लगायत स्थानको फोहोर नउठाउनु अराजकता हो, जिम्मेवार निकायको यो व्यवहारको सबैले विरोध गर्नैपर्छ। अर्कोतर्फ सरकारले पनि महानगरले उठाएका प्रश्नको बेवास्ता गर्दै धम्कीको भाषा प्रयोग गर्नु सिंहदरबारले स्थानीय निकायलाई हेर्ने दृष्टिकोणको प्रतिविम्ब हो। दुबै सच्चिनु पर्छ।’

• संसद विघटन