सुनसरी – चार वर्ष अगाडि निर्माण सम्पन्न भएर हस्तान्तरण भईसकेको सुनसरी स्थित इनरुवाको आधुनिक बसपार्क अझै सञ्चालनमा आउन सकेको छैन । शहरी विकास मन्त्रालयले स्मार्ट सिटी योजना अन्र्तगत निर्माण सम्पन्न गरेको बसपार्क इनरुवा नगरपालिकालाई हस्तान्तरण गरेपनि अहिलेसम्म सञ्चालनमा आउन नसकेको हो ।
चार बर्षअघि कोशी प्रदेशको प्रमुख तीन सहर बिराटनगर, फिदिम सहित इनरुवामा अत्याधुनिक सुविधा सहित बस टर्मिनल र बसपार्क निर्माण सम्पन्न भएका थिए । बिराटनगर र फिदिमको बसपार्क संचालनमा आएपनि इरुवाको बसपार्क सञ्चालनमा पटक-पटक किचलो देखिएपछि सञ्चालनमा आउन नसकेको हो ।
दुई पटक इनरुवा नगरपालिकाको पहलमा केही दिन सञ्चालनमा आएपनि अहिले बसपार्क बेवारिसे बनेको छ । इनरुवा नगरक्षेत्रमा सडक, ढल, बसपार्क सहित दुई अर्व रकम खर्च गरिने योजना अनुसार ११ करोडको लागतमा बसपार्क निर्माण भएको थियो । शहरी विकास मन्त्रालयले स्मार्ट सिटी योजनाका लागि विनियोजित रकममध्ये ८० करोड रुपैयाँ इनरुवा नगरक्षेत्रमा खर्च गर्नुपर्ने दावी गर्दै तत्कालिन नगरप्रमुख राजन मेहेताले मन्त्रालयसँग पटक-पटक ताकेता गरी डेलिगेशन समेत गएर ध्यानआर्कषण गराएको थियो । तर उक्त ८० करोड रुपैयाँ मन्त्रालयले इनरुवा नगरपालिकालाई नदिने भएपछि रुष्ट भएको नगरपालिका संघीय सरकारको शहरी विकास मन्त्रालयले गलत अडान नसच्चाउदा सम्म बसपार्क नचलाउने अडानमा बसेपछी लामो समय बसपार्क सञ्चालनमा आउन सकेन ।
पछी केही समय बसपार्क सञ्चालनमा ल्याइएपनि त्यो प्रभावकारी नहुदा अवस्था अहिले पनि त्यस्तै छ । कोशी प्रदेश ट्राफिक प्रहरी कार्यालयले पुरानो बसपार्क जोखिमपूणर् र व्यस्त सडकमा हुँदा सडक अवरोध समेत हुँदै आएकाले नयाँ स्थानमा निर्माण भएको बसपार्क सञ्चालनका लागि समन्वय गर्दा नगरपालिकाले चासो नदेखाउदा बसपार्क सञ्चालनमा आउन सकेको छैन ।
आधुनिक बसपार्कमा यात्रु प्रतिक्षालयका साथै आवास र होटल सहितको बन्दोवस्ती मिलाइएको छ । सुरक्षाका लागि पर्याप्त मात्रामा सीसी क्यामेरा र सोलार बत्तीसमेत जडान गरिएको छ ।
