राजविराज । राजविराज कारागारमा मानव बेचबिखन ओसारपसार मुद्दामा सजाय काटिरहेका एक कैदीको मृत्यु भएको छ । दुई वर्षअघि पक्राउ परी कारागारमा सजाय काटिरहेका सप्तरीको महादेवा गाउँपालिका–३ बथनाहाका ५४ वर्षीय मिथलेशकुमार यादवको मृत्यु भएको जिल्ला कारागार सप्तरीले जनाएको छ ।
यादव बिरामी भएपछि बिहीबार राजविराजस्थित गजेन्द्रनारायण सिंह अस्पताल भर्ना गरिएकोमा रेफर भई उपचारका लागि विराटनगरस्थित कोशी अस्पताल लगिएको थियो । कोशी अस्पतालमा उपचारका क्रममा यादवको मृत्यु भएको कारागार प्रमुख किशोर कुमार रामले बताए ।
छारेरोग र कलेजो रोगबाट ग्रसित मिथलेशको खुट्टा सुनिन थालेपछि अस्पताल भर्ना गरिएको मृतकका श्रीमती मञ्जुदेबी यादवले बताइन् । कारागार प्रशासनका अनुसार यो समेत गरी राजविराज कारागारका तीनजना कैदीको चैत यता मृत्यु भएको हो । यसअघि बैशाखमा ६९ वर्षीय पुरुषको र चैत महिनामा २४ वर्षीय युवकको मृत्यु भएको थियो ।
जिल्ला कारागारको बन्दी क्षमता १५ महिलासहित १५५ जना रहेकोमा हाल ३ सय ९१ जना कैदीबन्दी रहेको कारागार प्रशासनले जनाएको छ । कारागारमा ८० वर्षीयसहित ६५ वर्ष नाघेका १० जना जेष्ठ नागरिक छन् । कारागारमा १ जटिल र १ सामान्य मानसिक रोगी, २ एचआइभी संक्रमित र २ जना पक्षघातबाट पीडित कैदीबन्दीसमत छन् । रक्तचाप, चिनी, दम र मुटुलगायतका २० जना दिर्घरोगी छन् ।
मानव बेचबिखन ओसारपसार मुद्दामा अदालतबाट कैद सजाय तोकिएपछि फरार रहेका मिथलेशलाई ईलाका प्रहरी कार्यालय हनुमाननगरको प्रहरी टोलीले ०७७ चैत ११ गते घरबाटै पक्राउ गरेको थियो । जिल्ला अदालतबाट ५ वर्ष कैद सजायको फैसला भएका उनी पक्राउ परेदेखि कारागारमा रहेका थिए ।
शवलाई विराटनगरबाट राजविराज ल्याइएको छ । शव पोष्टमार्टमका लागि राजविराजस्थित गजेन्द्रनारायण सिंह अस्पतालमा राखिएको प्रहरी उपरीक्षक नरेन्द्र कुमार कार्कीले बताए । यादवसहित श्यामा राप्रावि प्रसवनीकी बाल विकास सहयोगी कार्यकर्ता ३९ वर्षीया द्रौपतीदेवी चौधरी र सप्तकोशी फत्तेपुरका ३१ वर्षीय मुकेशजंग खडकाले तालिममा भाग लिन भन्दै झुक्याई दुई बालिकालाई ०७० असार २२ गते इटहरी नगरपालिका–१ स्थित रंगमंच गेस्ट हाउस पु¥याएका थिए ।
पीडितहरूका अनुसार होटलमा पुगेपछि ललाईफकाई शारीरिक सम्बन्ध राख्न सुरूमा पैसाको प्रलोभन दिएको र नमानेपछि डरत्रास देखाई आरोपितहरूले हातपात गरेका थिए । होटलमा द्रौपतीदेबीले मुकेश र मिथलेशसँग पीडितहरूलाई बेचबिखन गर्ने तयारी गरिरहेको सुनेर सोही राति १० बजे बालिका होटलबाट भागेका थिए ।
सडकमा भाग्दै गरेको अवस्थामा राति भेटिएका सुनसरीको इटहरी नगरपालिका–५ का बलराम गुप्ताको सहयोगमा बालिकाले इटहरी नगरपालिका–७ स्थित चानोदेबी चौधरीको घरमा शरण लिई ज्यान जोगाएका थिए । चानोदेबीले किशोरीको घरमा तत्कालै फोन गरी ०७० असार २३ गते उनीहरूलाई घर फर्काएकी थिइन् ।
आरोपितहरूविरुद्ध पीडितहरूले जिल्ला प्रहरी कार्यालयमा ०७० साउन ६ गते किटानी जाहेरी दिएका थिए । सुरुमा उजुरी दर्ता गर्न आलटाल गरेको प्रहरीले ०७० साउन १७ गते मानव बेचबिखन, ओसारपसार र जबरजस्ती करणी उद्योगको मुद्दा दर्ता गरी आरोपित खडकालाई ०७० साउन १८ गते पक्राउ गरेको थियो ।
आरोपित खडका ०७० भदौ १३ गते जिल्ला अदालतका न्यायाधीश रामप्रसाद अधिकारीको इजलाशले पुर्पक्षका लागि कारागारमा थुनामा थिए । फरार रहेकी चौधरी केही समयपछि पक्राउ परी राजविराज कारागारमा कैद भुक्तान गरी निक्लिएकी छन् । ०७७ चैत ११ गते पक्राउ परेका यादवको कैद सजाय भुक्तान गर्न तीन वर्ष बाँकी थियो ।
