स्वास्थ्यमन्त्रीले ९ जनाको जिम्मेवारी एक्लै हेरफेर गरे

काठमाडौं । स्वास्थ्य तथा जनसंख्यामन्त्री मोहनबहादुर बस्नेतले स्वास्थ्य मन्त्रालयअन्तर्गतका नौजना उच्च अधिकारीको जिम्मेवारी हेरफेर गरेका छन् । मन्त्री बस्नेतले बुधबार दुई अस्पतालसहित विभिन्न विभागका अधिकारीहरूको जिम्मेवारी हेरफेर गरेका हुन् । राष्ट्रिय ट्रमा सेन्टरको मेडिकल सुपरिटेन्डेन्ट डा. बद्री रिजाललाई नियुक्त गरी यसअघि सो जिम्मेवारीमा रहेका डा. रुद्र मरासिनीलाई इपिडिमियोलोजी तथा रोग नियन्त्रण महाशाखा ईडीसीडी निर्देशकको जिम्मेवारी दिइएको छ ।

औषधि व्यवस्था विभागको महानिर्देशको जिम्मेवारी नारायण ढकाललाई दिइएको छ भने यसअघि महानिर्देशक रहेका भरत भट्टराईलाई राष्ट्रिय औषधि प्रयोगशाला प्रमुखमा नियुक्त गरिएको छ । परोपकार प्रसूति गृहमा यसअघि निर्देशक रहेका डा. पवनजंग रायमाझी र यसअघि ईडीसीडी निर्देशक डा. चुमनलाल दासलाई स्वास्थ्य मन्त्रालयमा ल्याइएको छ । प्रसूति गृहको निर्देशकमा डा. श्रीप्रसाद अधिकारीलाई पठाइएको छ ।

तालिम केन्द्रका निर्देशक डा. यदुचन्द्र गौतमलाई पनि मन्त्रालयमा नै ल्याइएको छ भने केन्द्रमा डा. अनुज भट्टचनलाई निर्देशक नियुक्त गरिएको छ ।

• संसद विघटन